ŴaLevi 26 - Tonga Bible 1986

Kulangika pa kuwura kuvwiya

¹ “Mungajichitiyanga ŵangoza cha nanga nkhumika ŵangoza wakusemeka pamwenga chimuzati cha, ndipo mungamikanga mwa wakusemeka mu charu chinu kuvisopa vyo cha, pakuti ine ndine Ambuya Chiuta winu.

² Musungenge masabata ghangu ndi kutumbika malo ghangu ghakupaturika. Ndine Ambuya.

³ “Asani muvwenge malangulu ghangu ndi kuphwere marangu ghangu kughachita,

⁴ ndikakupaskaninga vuwa mu nyengo zake, ndipo charu chikapasanga vipasi vyake.

⁵ Mbeu zinu zikakwananga kwachifika ku chivuna cha mphereska, ndi chivuna cha mphereska kwachifika ku nyengo ya kupanda; mukarghanga ndi kuguta, ndi kuja mu charu chinu kwambura mantha.

⁶ Ndikapaskanga chimangu mu charu mwakuti mukaranga pasi kwakufwasa, ndipo paulengevi nanga njumoza wakumofyani. Ndikatuzgangamo vikoko vyakofya mu charu ndipo lipanga kuti likaporotanga mu charu chinu cha.

⁷ Mukadikiskanga ŵarwani ŵinu ndipo ŵakafwanga ndi lipanga linu.

⁸ Ŵankhondo ŵaku imwe ŵakadikiskanga machumi pe chumi (100) machumi pe chumi (100) ŵaku imwe ŵakadikiskanga vikwi chumi (10,000); ndipo ŵamawongo ŵinu ŵakawanga ndi lipanga paurongo pinu.

⁹ Ndikaphwerenga imwe pa kumupaskani mphapu ndi kumwandaniskani, ndipo ndikafiskanga phanganu langu ndi imwe.

¹⁰ Mukarghanga vyakulonga vya kale, ndipo mukatuzgangamo vyakale kusiyiya malo vyakurgha vifya.

¹¹ Ine ndikajanga mukati mwaku imwe, ndipo kuti ndikakutinkhaninga cha.

¹² Ndikayendanga mukati mwinu, ndikaŵanga Chiuta winu, ndipo imwe mukaŵanga ŵanthu ŵangu.

¹³ Ndine Ambuya Chiuta winu, yo wangukutuzgani mu charu cha Egipiti kuti mureke kuŵa ŵaŵanda ŵawo. Ine ndafyo mpiringizgu ya gori linu kuti mwende kwakunyoroka.

¹⁴ “Kweni asani murekenge kundivwiya, ndi kuti mukachitanga kwakuyana ndi marangu ghose yagha cha,

¹⁵ asani mukayeyanga malangulu ghangu, mtima winu ukakananga vyeruzgu vyangu, mwakuti, kuti mukachitanga marangu ghangu ghose cha kweni muswenge phanganu langu.

¹⁶ Ndikakuchitiyaninga ichi: Nkhatumanga paku imwe chofyo, nthenda ya liwondi-wondi, ndi yakumbwambwanthiya, ndi chideru cha kujara maso mwakuti umoyo ureke kukhumbikwa. Ndipo mukaseŵanga waka mbutu zinu, ŵarwani ŵinu ndiwo ŵakazirghanga.

¹⁷ Ndikapindikananga namwe, ndipo mukapumikanga paurongo pa ŵamawongo ŵinu; ŵanthu ŵakumutinkhani ndiwo ŵakakuwusaninga, inya mwazamuthaŵa ndi penipo palivi wakumudikiskani.

¹⁸ Ndipo asani mutondeka kundivwiya mwaku vyose ivi Ine ndikamulanganinga so kuwerezgapo kankhonde ndi kaŵi, chifukwa cha maulakwi ghinu.

¹⁹ Nkhabwanganduwanga kujikuzga kwinu kwa nthazi, ndipo nkhasanduskanga mudengwende kuŵa nge nchisulo, ndi charu chapasi nge ndi mkuŵa.

²⁰ Mukatayanga nthazi zinu pa ŵaka, chifukwa charu chinu kuti chipasenge vyakuzala cha, ndipo miti yamu charu cho kuti yikapasanga vipasi vyake cha.

²¹ “Viyo asani mwendenge kwakupambana nane, ndipo kuti mukandivwiyanga cha, ndikatolenga videru vinyake paku imwe kusazgapo kankhonde ndi kaŵi kuruska unandi wa maulakwi ghinu.

²² Ndipo nkhakhuŵirizganga vikoko vya mudondo vyo vikampokaninga ŵana ŵinu, ndi kubaya ng'ombe zinu, ndi kuwutuska unandi winu, viyo kuti nthowa zinu zikawuwanga.

²³ “Ndipo pakulanga kwaviyo asani, murekenge kuwere kwangu, kweni mwendenge kwakupambana nane,

²⁴ iku ine nane nkhayendanga kwakupambana namwe, ndipo ine ndamweni ndikamupumaninga kuwerezgapo so kankhonde ndi kaŵi, chifukwa cha maulakwi ghinu.

²⁵ Ndipo nkhatolenga nkhondo paku imwe yo yikatayiyanga thayu phanganu lo. Asani mukawungananga mu misumba yinu nkhatumanga zinthenda mukati mwinu, ndipo mukaperekekanga mu janja la murwani winu.

²⁶ Panyengo yo nkhadumuwanga uzali wa vyakurgha, ŵanthukazi chumi ŵakamubikiyaninga chiŵande mu zenji limoza, ndipo ŵakachitanga kupima chiŵande chinu; mukarghanga kweni kuti mukagutanga cha.

²⁷ “Ndipo asani kuti mukandivwiyanga cha pavuli pakuwona vyose ivi, kweni mukayendanga kwakupambana nane,

²⁸ iku ine nane ndikayendanga kwakupambana namwe ndi ukari, ndimulangeninge ndamweni kuwerezgapo kankhonde ndi kaŵi chifukwa cha maulakwi ghinu.

²⁹ Mukarghanga munofu wa ŵana ŵinu ŵanthurumi ndi ŵana ŵinu ŵanthukazi.

³⁰ Nkhaparghang'anga malo ghinu gha pachanya ndi kugumuliya pasi majochero ghinu gha vyachema ndi kupong'a viŵanda vinu pachanya pa viŵanda vya ŵangoza ŵinu mtima wangu umukaneninge.

³¹ Nkhawiskanga misumba yinu, ndi malo ghinu ghakupaturika, ndipo kuti nkharondanga vyakupereka vinu vyafungu lakundikondweska cha.

³² Ndipo nkhapasuwanga charu cho, viyo kuti ŵamawongo ŵinu wo ŵajengemo ŵakazizwanga pakuchiwona.

³³ Ndipo ndikaparghang'iyanga imwe mu mitundu, ndipo nkhawewepuwanga lipanga mu chibazi kukudikiskani; charu chinu chikaŵanga phasulu, ndipo misumba yinu yikaŵanga mapopa.

³⁴ “Sono charu chikakondwanga ndi masabata ghake nyengo yose yo chikaŵiyanga mapopa, penipo imwe mwe mu charu cha ŵamawongo ŵinu, viyo charu chikapumuwanga, ndi kukondwa ndi masabata ghake.

³⁵ Nyengo yose yo chikaŵiyanga cha uyiku chikapumuwanga, kupumuwa ko chengavi mu masabata gha nyengo yo imwe mwajariyangamo.

³⁶ Ndipo ndikatumanga kulakatuka mu mitima yaku wo ŵaku imwe, wo ŵakasiyikangamo po ŵe mu vyaru vya ŵamawongo ŵawo; ŵakathaŵanga pakuvwa muswayo wa jani lakuputa, ŵakathaŵanga ulaka ndi yo wathaŵa lipanga, ndipo ŵakawanga pasi penipo palivi wakuŵandondoloska.

³⁷ Ŵakaguŵanga uyu mu munyake, nge mbakuthaŵa lipanga, chingana palivi wakuŵandondoloska; ndipo mukawulangavi nthazi zakumiya paurongo pa ŵamawongo ŵinu.

³⁸ Mukamariyanga mu mitundu, ndipo charu cha ŵamawongo ŵinu chikamumezaninga.

³⁹ Ndipo ŵa mwaku imwe wo ŵakajangapo ŵakachitanga liwondi-wondi mu vyaru vya ŵarwani ŵinu chifukwa cha uheni wawo; ndi chifukwa cha mauheni gha auskeu nge ndi wo.

⁴⁰ “Kweni asani ŵakazomeranga ulakwi wawo ndi ulakwi wa auskeu wa urghargha wo ŵanguchitiya ine; ndi ulakwi wakwenda kwakupambana nane,

⁴¹ viyo kuti nane so ndingwenda kwakupambana nawo, ndi kuŵatole mu charu cha ŵamawongo ŵawo, asani mtima wawo wambura kuchinjika ukajiyuyuwanga ndi kuchita umampha mu malo gha uheni wawo;

⁴² sono po ndipo nkhakumbukanga phanganu langu ndi Yakobe ndi phanganu langu ndi Yisaki ndi phanganu langu ndi Abrahamu, nkhakumbukanga charu cho.

⁴³ Kweni iwo ŵakachisiyanga charu, ndipo charu cho chikakondwanga ndi masabata ghake, po che mu uyiku kwambura kuŵamo iwo, iwo ŵakachitanga umampha mu malo gha uheni, chifukwa ŵangutaya vyeruzgu vyangu, ndipo ŵangukana malangulu ghangu.

⁴⁴ Ndipuuli, po ŵeche mu charu cha ŵamawongo ŵawo, kuti ndikaŵatayanga cha chingana nkhuŵakana, kuti ndiŵamariye limu wose ndi kureka phanganu langu lo ndingupangana nawo; pakuti Ine ndine Ambuya Chiuta wawo:

⁴⁵ kweni pa chifukwa chawo nkhakumbukanga phanganu lo ndingupangana ndi auskeu wo ndingutuzga mu charu cha Egipiti mu maso gha mitundu kuti ine ndiŵenge Chiuta wawo Ndine Ambuya.”

⁴⁶ Yagha ndi malangulu ndi vyeruzgu ndi marangu gho Ambuya angunena kwaku Mosese kuti iwo angupangana ndi ŵaYisraele pa phiri la Sinai.