ŴaLevi 23 - Tonga Bible 1986

Nyengo zakutemeka za Ambuya

¹ Ambuya anguti kwaku Mosese,

² “Kamba ku ŵaYisraele, kuti, Madghera ghakulangurika ndi Ambuya gho mukamemezanga, ndi maungano ghakupaturika, madghera ghangu ghakulangurika ndi yagha:

³ Mazuŵa ghankhonde ndi limoza ghakuchitiya nchitu: kweni pa zuŵa la chinkhonde ndi chiŵi ndi sabata la chipumulu chakupaturika, kuwungana pamoza kusopa; kuti mukachitanga nchitu cha; ndi sabata ku Ambuya mu malo ghinu ghose ghakujamo.

Phaska

⁴ “Yagha ndigho madghera ghakulangurika gha Ambuya, kuwungana ndi kusopa kwakupaturika, gho mukamemezanga pa nyengo yake yakutemeka.

⁵ Mu mwezi wakudanga, pa zuŵa la chumi pachanya ghanayi, ku mazulo ndi phaska la Ambuya.

⁶ Ndipo pa zuŵa la chumi pachanya ghankhonde mwezi weniwo pe ndi dghera la chiŵande chambura mtupu ku Ambuya; mukarghanga chiŵande chambura mtupu mazuŵa ghankhonde ndi ghaŵi.

⁷ Pa zuŵa lakudanga mukawungananga ndi kusopa, kuti mukachitanga nchitu yikuru cha,

⁸ kweni mukaperekanga sembe yapa moto ku Ambuya mazuŵa ghankhonde ndi ghaŵi: pa zuŵa la chinkhonde ndi chiŵi mbunganu wakusopa, kuti mukachitanga nchitu yizitu cha.”

Vipasi vya mruwuku

⁹ Ndipo Ambuya anguti kwaku Mosese,

¹⁰ “Kamba ku ŵaYisraele kuti, mutakuti mwafika mu charu cho nditukupaskani, ndi kuvuna vuna yake, mukazanga ndi nchinda ya vipasi vyakudanga vya vuna yinu ku mzukuru;

¹¹ iyo wakazungung'anga nchinda yo paurongo pa Ambuya, alinga kuti muŵe ŵakulondereka, mzukuru wayizungung'enge ndi mlenji pavuli pa sabata.

¹² Ndipo pa zuŵa lo mzungung'iyenge nchinda yo, mukaperekanga mberere yinthurumi ya chirimika chimoza mu ura wake, yambura kalema; kuŵa sembe yakocha ku Ambuya.

¹³ Ndipo sembe ya ufwa yiperekeka pamoza nayo, yiŵenge vigaŵa viŵi vya chumi vya sokora ya ufwa wamampha wakusazga ndi mafuta, kuwupereka pa moto ku Ambuya kuŵa chema chakukondweska, sembe ya kumwa yakuperekeke pamoza nayo yiŵenge vinyo, chigaŵa chimoza cha vigaŵa vinayi vya mweso wa hini.

¹⁴ Kuti mukarghanga chiŵande nanga ndi mbuto zakumizga pamwenga ziŵisi cha, mpaka zuŵa lenili, mpaka penipo mwaza ndi sembe yaku Chiuta winu: Ili ndi langulu muyaya mu migonezi yose mu malo ghinu ghakujamo.

¹⁵ “Ndipo mwambenge kuŵerenga ndi mlenji pavuli pa sabata, kwamba pa zuŵa lo munguza ndi nchinda ya sembe yakuzugung'a. Muŵerenge ŵasabata ŵankhonde ndi ŵaŵi ŵakukwana,

¹⁶ kuŵerenga mazuŵa machumi ghankhonde (50), kufika ku mlenji pavuli pa sabata wa chinkhonde ndi chiŵi; penipo ndipo muperekenge sembe ya vipasi vifya ku Ambuya.

¹⁷ Mukazanga kutuwa mo muja ndi viŵande viŵi vyakuchitika ndi vigaŵa viŵi vya chumi vya sokora kuŵa vyakuzungung'a; vikaŵanga vya ufwa wamampha, vikachitikanga ndi mtupu, kuŵa vipasi vyakudanga ku Ambuya.

¹⁸ Ndipo pamoza ndi viŵande muperekenge mberere zinkhonde ndi ziŵi za chirimika chimoza zambura kalema; kankhuzi kamoza, ndi ŵabira ŵaŵi; vikaŵanga sembe yakocha ku Ambuya, pamoza ndi sembe yawo ya ufwa ndi sembe zakumwa, sembe yapa moto, chema chakukondweska ku Ambuya.

¹⁹ Muperekenge mbuzi yinthurumi yimoza, sembe yapa ulakwi; ndi mberere zinthurumi ziŵi za chirimika chimoza kuŵa sembe zakuperekeke chimangu.

²⁰ Mzukuru wavizungung'e paurongo pa Ambuya pamoza ndi viŵande vya vipasi vyakudanga kuŵa sembe yakuzungung'a paurongo pa Ambuya pamoza ndi mberere zo ziŵi; vikaŵanga vyakupaturika ku Ambuya pa mzukuru.

²¹ Ndipo zuŵa lenilo mukamemezanga ungano wakupaturika; kuti mukachitanga nchitu yanthazi cha. Ili ndilangulu muyaya mu malo ghinu ghakujamo mu migonezi yinu yose.

²² “Ndipo muchivuna vuna wa charu chinu, mungavunanga kwachifiska ku mphaka ya munda cha, chingana nkhukonkhoska kukonkho mwati mwavuna cha. Mukasiyiyanga ŵakavu ndi mlendo. Ine ndine Ambuya Chiuta winu.”

²³ Ndipo Ambuya anguti kwaku Mosese,

²⁴ “Kamba ku ŵaYisraele kuti, mu mwezi wa chinkhonde ndi chiŵi pa zuŵa lakudanga la mwezi mukasunganga zuŵa la chipumulu chakupaturika; chikumbusku chakumemezeka ndi chizozo cha zimbata kuwungana ndi kusopa.

²⁵ Kuti mukachitanga nchitu yizitu cha, ndipo mukaperekanga sembe ya moto ku Ambuya.”

Zuŵa la mphepeska

²⁶ Ndipo Ambuya anguti,

²⁷ “Pa zuŵa la chumi la mwezi uwu wa chinkhonde ndi chiŵi ndi zuŵa la mphepeska; likaŵanga kwaku imwe nyengo yakuwunganirana kwakupaturika. Penipo mukajitangwaniskanga ndi kupereka sembe yapa moto ku Ambuya.

²⁸ Ndipo mu zuŵa lo kuti mukachitanga nchitu cha; pakuti ndi zuŵa la chipepeska, kumupepeskiyani imwe paurongo pa Ambuya Chiuta winu.

²⁹ Yose yo walivi kutangwanika mu zuŵa lenili wakadumulikangako ku ŵanthu ŵake.

³⁰ Ndipo yose wakuchita nchitu ye yose pa zuŵa ili, munthu yo, ine nkhamuparghang'anga kumutuzgamo mu ŵanthu ŵake.

³¹ Kuti mukachitangapo nchitu nanga njimoza cha. Ili ndi langulu muyaya mu migonezi yinu yose mu malo ghinu ghose ghakujamo.

³² Likaŵanga kwaku imwe sabata lakupaturika la chipumulu, ndipo mukajitagwaniskanga; pa zuŵa la chinkhonde ndi chinayi la mwezi, mukasunganga sabata linu kwamba ndi mazulo, kutuwa ku mazulo kuya ku mazuli ghanyake.”

Phaska la misasa

³³ Ndipo Ambuya anguti kwaku Mosese,

³⁴ “Kamba ku ŵaYisraele, pa zuŵa la chumi ndi ghankhonde la mwezi uwu wa chinkhonde ndi chiŵi, kwa muzuŵa ghankhonde ndi ghaŵi, ndi dghera la misasa ku Ambuya.

³⁵ Pa zuŵa lakudanga pakaŵanga ungano wakupaturika; kuti mukachitanga nchitu yanthazi cha.

³⁶ Mu mazuŵa ghankhonde ndi ghaŵi mukaperekanga sembe zapa moto ku Ambuya; pa zuwa la chinkhonde ndi chitatu muchitenge ungano wakupaturika ndi kupereka sembe yapa moto ku Ambuya; mbungano wakusopa; kuti mu kachitanga nchitu cha.

³⁷ “Yagha ndigho madghera ghakutemeka gha Ambuya, gho mukamemezanga pa zinyengo za maungano ghakupaturika ghakuperekiyapo ku Ambuya sembe zapa moto, sembe zakocha ndi sembe za ufwa, sembe ndi mipasku ya kumwa, dghera lose pa zuwa lake ndi lake lakutemeka;

³⁸ pamoza ndi masabata gha Ambuya, mukasazgiyangapo vyaulera vinu, mipasku yinu ya mphenduzga ndi mipasku yinu ya wanangwa yo mupaska ku Ambuya.

³⁹ “Pa zuŵa la chumi la mwezi wa chinkhonde ndi chiŵi po mwawunjika pamoza vyakurgha vyamu charu cho, muchitenge dghera la Ambuya mazuŵa ghankhonde ndi ghaŵi. Pa zuŵa laku danga mukapumuwanga mu kusopa, ndi viyo so pa zuŵa la chinkhonde ndi chitatu mukapumuwanga ndi kusopa.

⁴⁰ Pa zuŵa lakundanga mukatonga vipasi vya mu miti ya mampha, ndi mphanda za kanchindu, ndi malombo gha mu msinji, ndipo mukakondwanga paurongo pa Ambuya Chiuta winu mazuŵa ghankhonde ndi ghaŵi.

⁴¹ Mukalisunganga nge ndi dghera la Ambuya mazuŵa ghankhonde ndi ghaŵi mu chirimika. Ndi langulu muyaya mu migonezi yinu yose lakuti mukalisunganga mwezi wose wachinkhonde ndi chiŵi.

⁴² Mukajanga mu misasa mazuŵa ghankhonde ndi ghaŵi. Wose wo mba Yisraele ŵakajanga mu misasa,

⁴³ alinga kuti migonezi yinu yiziŵe kuti ndine ndingulanguliya ŵaYisraele kuja mu misasa, ndinguti ndaŵatuzga mu charu cha Egipiti. Ine ndine Ambuya Chiuta winu.”

⁴⁴ Viyo ndimo Mosese wangutauliya ku ŵaYisraele za madghera ghakutemeka gha Ambuya.