ŴaLevi 22 - Tonga Bible 1986

Ŵazukuru ndi vinthu vyakupaturika

¹ Ndipo Ambuya angutiti kwaku Mosese,

² “Kambiya Aroni ndi ŵana ŵake kuti ŵajituzgeko ku vinthu vyakupaturika vya ŵaYisraele, vyo ŵatuvipaturiya kwaku ine, alinga kuti ŵareke ku kazuzga zina langu lakupaturika. Ndine Ambuya.

³ Uŵakambiye, ‘Asani we yose wa mphapu yinu mu migonezi yose waŵandika ku vinthu vyakupaturika, vyo ŵaYisraele ŵapaturiya ka Ambuya, penipo iyo ngwakukazuzgika, munthu yo wakadumulikangako kwaku Ine. Ndine Ambuya.

⁴ Paulevi yomoza wa fuko laku Aroni yo ngwamakhate pamwenga wakutama ndi thenda yaku suruwa warghengepo vinthu vyakupaturika mpaka po watozgeka. We yose yo wakwaska kanthu ka ukazuzi chifukwa cha kukwaska wakufwa pamwenga munthu yo wakoza upafi;

⁵ ndi yose wakukwaska chamoyo chakukwaŵa pasi cho chingamukazuzga pamwenga munthu yo wangamukazuzga ndi ukazuzi we wose,

⁶ munthu waviyo wakaŵanga wakunguzgika mpaka mazulo; ndipo kuti wakarghangapo cha vinthu vyakupaturika kwambura kuti wasamba.

⁷ Pavuli po dazi lasere, wakaŵanga wakutozgeka, sono wangaziŵa kurghapo vinthu vyakupaturika pakuti vyo ndivyo kurgha kwake.

⁸ Cho nchakufwa chija pamwenga chakupalurika ndi vikoko wangarghanga cha, kujikazuzga nacho: Ndine Ambuya.’

⁹ Chifukwa cho ŵazukuru ŵakavwiyanga kurangula kwangu; vinu ŵangatopo ulakwi ndi ŵangafwa pakukazuzga zina langu: Ndine Ambuya wo atiŵapatuwa.

¹⁰ “Munthu ŵaka wangarghangapo cha chinthu chakupaturika. Mlendo wakutandara wa mzukuru pamwenga wanchitu wa mphoto wangarghangapo cha chinthu chakupaturika;

¹¹ kweni asani mzukuru wagula muŵanda kuŵa wake, ndi ndrama zake, muŵanda yo wangaziŵa kurghapo cho, ndipo wo ŵapapika mu nyumba yake ŵangarghapo kurgha kwake.

¹² Asani mwana muthukazi wa mzukuru waŵirwa ku munthu wake kuti wakarghangapo cha vya sembe ya vinthu vyakupaturika.

¹³ Kweni asani mwana munthukazi wa mzukuru nchoko pamwenga ngwakupatika ndi munthurumi, ndipo walivi mwana; ndipo wawere ku nyumba ya awiske mo walili weche muŵisi, wangaziŵa kurgha kwa awiske; kweni munthu waka kuti warghengepo cho cha.

¹⁴ Asani munthu warghapo chinthu chakupaturika kwambura kuziŵa, wakasazgiyangako chigaŵa chimoza cha vinkhonde cha mtengo wake. Ndipo wakaperekanga chinthu chakupaturika cho ku mzukuru.

¹⁵ Ŵazukuru ŵareke ku kazuzga vinthu vyakupaturika vya ŵaYisraele, vyo wapereka ku Ambuya,

¹⁶ vinu vingazigha kunyamuwa maulakwi ndi kususkika, pakurgha vinthu vyawo vyakupaturika; pakuti; Ndine Ambuya wo atiŵapatuwa.”

¹⁷ Ambuya angunena ndi Mosese,

¹⁸ “Kamba kwaku Aroni ndi ŵana ŵake, ndi ku ŵaYisraele wose, Asani munthu ngwa nyumba yaku Yisraele, pamwenga ya ŵalendo ŵakutandara mwaku Yisraele wapereka sembe yake, manyi njakulipa rapu, pamwenga nja wanangwa yo yiperekeka ku Ambuya sembe yakocha,

¹⁹ wakaperekanga yinthurumi yambura kalema, yakutuwa ku nkhuzi pamwenga mberere pamwenga mbuzi kuti yilondereke.

²⁰ Mungaperekanga cho che ndi kalema, pakuti kuti chikalonderekanga cha kwaku imwe.

²¹ Ndipo penipo munthu wapereka sembe ya chimangu ku Ambuya, kufiska rapu, pamwenga ya wanangwa kutuliya ku mskambu pamwenga ku viŵetu, yitenere kuŵa yimphyemphyemu, muwulevi kalema mwako yo mwakuti yilondereke.

²² Nyama zachibulumutiya, zakupunduka, pamwenga zakudumuka chiŵalo, zakusuruwa zakamukono pamwenga zavitipatupa, mungaziperekanga ku Ambuya cha chingana nkhuzipereka nge ndi sembe yakocha pa jochero ku Ambuya.

²³ Nkhuzi pamwenga mberere yo yendi chiŵalo chakulutiriya utali pamwenga chakulutiya ufupi mungaziŵa kuyipereka kuŵa sembe ya wanangwa kweni pa sembe ya mphenduzga kuti yingalondereka cha.

²⁴ Nyama yose yakuŵa ndi thongo lakupwetekeka, lakuphwafuka, lakuparuka, pamwenga lakudumuka, mungaperekanga ku Ambuya cha, pamwenga kujichitiya sembe mukati mu charu chinu cha,

²⁵ nyama yose ya mtundu uwu yo mwaronde ku mlendo mungaperekanga kuŵa chakurgha chaku Chiuta winu cha. Pakuti mwe kalema mwaku yo, chifukwa cha kupunduka kwake, kuti yikalonderekanga cha kwaku imwe.”

²⁶ Ambuya angunena ndi Mosese,

²⁷ “Asani nkhuzi pamwenga mberere, pamwenga mbuzi yapapika, yikajanga mazuŵa ghankhonde ndi ghaŵi pamoza ndi nyina; ndipo kwamba pa zuŵa lachinkhonde ndi chitatu yikalonderekanga kuŵa sembe yakocha ku Ambuya.

²⁸ Ndipo manyi nyina wake ndi ng'ombe pamwenga mberere, kuti mukabayanga zose ziŵi nyina ndi mwana mu zuŵa limoza pe cha.

²⁹ Ndipo muchipereka sembe yakuwonga ku Ambuya mukaperekanga yeniyo alinga kuti mulondereke.

³⁰ Yirghikenge zuŵa lenilo kuti musiyengepo yaku yo mpaka mlenji cha: Ndine Ambuya.

³¹ “Viyo musungenge marangu ghangu ndi kughachita: Ndine Ambuya.

³² Mungakazuzganga zine langu lakupaturika cha, kweni ŵaYisraele ŵakandipatuwanga ine; Ine Ndine Ambuya wo atimupatuwani;

³³ mweniyo wangumutuzgani mu charu cha Egipiti kuti waŵe Chiuta winu. Ndine Ambuya.”