ŴaLevi 15 - Tonga Bible 1986

Dangu la kujitozga

¹ Ambuya angunena kwaku Mosese ndi Aroni,

² “Nenani ku ŵaYisraele, kuti, asani munthurumi we ndi nthenda ya kusuruwa mu liŵavu lake, kusuruwa kwake nkhwakukazuzgika.

³ Ndipo ili ndi dangu lapa kuwura kutozgeka kwa wa nthenda yakusuruwa; manyi liŵavu lake lisuruwa pamwenga liŵavu lake lareka kusuruwa ngwakukazuzgika.

⁴ Chita chose cho walapo chikaŵanga chakunguzgika; ndi kanthu kose ko wajapo nkhakunguzgika.

⁵ Ndipo yo wakakwaskanga chita chake wakachapanga vyakuvwara vyake, ndi kusamba mu maji, wakaŵanga wakukozuzgika mpaka mazulo.

⁶ Ndipo yose wakuja paku chose cho wangujapo yo wendi nthenda ya kusuruwa, wakachapanga vyakuvwara vyake, ndipo wakasambanga, wakaŵanga wakukazguzgika mpaka mazulo.

⁷ Ndipo yose wakukwaska liŵavu laku yo wendi nthenda ya kusuruwa wakachapanga vyakuvwara vyake, ndi kuŵa wakunguzgika mpaka mazulo.

⁸ Asani yo wendi nthenda ya kusuruwa wafunyiya mata pa wakutozgeka, sono uyu wakachapanga vyakuvwara vyake, ndi kusamba, waŵe wambura kutozgeka mpaka mazulo.

⁹ Ndipo asani wakusuruwa wakwere pa chiŵeto, chakujapo chake chapa chiŵeto cho chikaŵanga chakunguzgika.

¹⁰ Ndipo yose wakukwaska chose cho wangujapo, wakaŵanga wakukazuzgika mpaka mazulo; ndipo yose wakunyamuwa chinthu cha viyo wakachapanga vyakuvwara vyake, wakasambanga mu maji, ndi wakaŵanga wakukazuzgika mpaka mazulo.

¹¹ We yose wakukwaskika ndi wakusuruwa, yo kuti wadanga wasamba manja ghake mu maji cha, wakachapanga vyakuvwara vyake, ndi kusamba mu maji, wakaŵanga wakunguzgika mpaka mazulo,

¹² Chiyaŵi cha dongo cho wakwaska wakusuruwa, chisweke ndipo chiyaŵi chose cha muti chisukike ndi maji.

¹³ “Ndipo penipo wakusuruwa watozgeka ku kusuruwa kwake, wakajiŵerengiyanga mazuŵa ghankhonde ndi ghaŵi gha kutozgeka kwake, ndi kuchapa vyakuvwara vyake; wakasambanga mu maji ghakwenda, ndipo wakaŵanga wakutozgeka.

¹⁴ Pa zuŵa la chinkhonde ndi chitatu, wakatonga tunjiŵa tuŵi pamwenga tuviunda twa nkhunda tuŵi, ndi kuza paurongo pa Ambuya pa khomo la hema lakuwunganamo, wakatupaskanga ku mzukuru.

¹⁵ Mzukuru wakaperekanga, kamoza pa sembe yapa ulakwi ndi kanyake pa sembe yakocha; ndipo mzukuru wakamupepeskiyanga paurongo pa Ambuya pa kusuruwa kwake.

¹⁶ “Kweni asani munthurumi wakoza upafi, wakasambanga liŵavu lake lose mu maji, ndi wakaŵanga wambura kutozgeka mpaka mazulo.

¹⁷ Ndipo chakuvwara chose ndi khungu lose paku lo upafi wadikapo wavisuke ndi maji, kweni vikaŵanga vyakunguzgika mpaka mazulo.

¹⁸ Nanga ndi munthukazi yo wagona ndi munthurumi wakukoza upafi, wose ŵaŵi ŵasambe mu maji, ndipo ŵaŵange ŵakukazuzgika mpaka mazulo.

¹⁹ “Asani munthukazi wemu masambi ndipo masambi ghake gharutiliya, wakaŵanga wakukazuzgika mazuŵa ghankhonde ndi ghaŵi, yose yo wangamukwaska wakaŵanga wakukazuzgika mpaka mazulo.

²⁰ Ndipo chose cho wagonapo pa nyengo yakuwura kutowa kwake chikaŵanga chakunguzgika; ndipo so chose cho wajapo chikanguzgikanga.

²¹ Ndipo yose wakukwaska chakulapo chake wakasambanga maji, wakaŵanga wakukazuzgika mpaka mazulo.

²² Ndipo yose wakukwaska chose cho wajapo wakachapanga vyakuvwara vyake, wakasambanga maji, ndipo wakaŵanga wakukazuzgika mpaka mazulo;

²³ manyi, nchita, pamwenga nchakujapo cho wajapo, yo yose wangachikwaska wakaŵanga wakukazuzgika mpaka mazulo.

²⁴ Ndipo asani munthurumi wala nayo po weche wakukazuzgika, ndipo masambi ghake ghaŵa mwaku iyo, iyo nayo wakaŵanga wakukazuzgika mazuŵa ghankhonde ndi ghaŵi, ndipo chita chose cho munthurumi walapo chikaŵanga chakunguzgika.

²⁵ “Asani munthukazi waŵa ndi kusuruwa ndopa kwa mazuŵa ghanandi, pa nyengo yake ya masambi cha, pamwenga asani wendi kusuruwa kwakurutizga nyengo yake ya masambi; mazuŵa ghose ghakusuruwa wakarutiliyanga kuŵa wakukazuzgika uli ndi mu mazuŵa ghake gha masambi, wakaŵanga wakukazuzgika.

²⁶ Chita chose cho walapo mu mazuŵa ghose gha kusuruwa kwake, chikaŵanga nge nchakulapo cha masambi; ndipo chose cho wangajapo chikaŵanga chakunguzgika, uli ndi mu nyengo yake ya masambi.

²⁷ Ndipo munthu yose wakukwaska vinthu ivi wakaŵanga wakukazuzgika, ndipo wakachapanga vyakuvwara vyake, ndi kusamba mu maji; ndi wakaŵanga wakunguzgika mpaka mazulo.

²⁸ Kweni asani watozgeka ku masambi ghake wakajiŵerengiyanga mazuŵa ghankhonde ndi ghaŵi; ndipo pavuli pa mazuŵa gho wakatozgekanga.

²⁹ Ndipo pa zuŵa la chinkhonde ndi chitatu wakatonga njiŵa ziŵi pamwenga tuviunda twa nkhunda tuŵi ndi kuza nato ku mzukuru pa khomo la hema lakuwunganamo.

³⁰ Ndipo mzukuru wakaperekanga kamoza pa sembe yapa ulakwi, ndi kanyake pa sembe yakocha; mzukuru wakamupepeskiyanga paurongo pa Ambuya pa chifukwa cha munguzgu wa masambi.

³¹ “Viyo ndimo mukaŵatuzgiyangako ŵaYisraele ku kukazuzgika kwawo vinu ŵangafwiya mu kuwura kutozgeka kwawo pakukazuzga chihema changu cho che mukati mwawo.”

³² Ili ndi dangu laku yo wendi kusuruwa ndi laku yo wakoza upafi, pa kuŵa wambura kutozgeka;

³³ ndi ku munthukazi wakutama ndi masambi, ndiku kuti kwaku we yose, munthurumi pamwe­nga munthukazi yo wendi kusuruwa ndi munthurumi yo wala ndi munthukazi wambura kutozgeka.