ŴaLevi 13 - Tonga Bible 1986

Kupimika kwa nthenda ya makhate

¹ Ambuya anguti kwaku Mosese ndi Aroni,

² “Asani munthu pa khungu la liŵavu lake we ndi chitufya pamwenga chakuphumuka pamwenga bamba, ndipo chasanduka nthenda ya makhate pa khungu la liŵavu lake; sono ŵamutole kwaku Aroni mzukuru yo pamwenga ku yumoza wa ŵana ŵake ŵazukuru.

³ Ndipo mzukuru wakapimanga malo gha khungu lake po nthenda yiri; ndipo asani cheya cha pa malo gha nthenda chasanduka chituŵa, ndipo nthenda yiwoneka kuti yasere mukati mu khungu lake, iku ndi nthenda ya makhate. Pavuli pakupimika mzukuru wakamukambanga kuti ngwakunguzgika.

⁴ Kweni asani chiŵawo nchituŵa pa khungu la liŵavu lake ndipo kuti chasere mu khungu cha, cheya cha penipo kuti chasanduka chituŵa cha, iku mzukuru wakamujariyanga munthu yo wa nthenda mazuŵa ghankhonde ndi ghaŵi.

⁵ Ndipo mzukuru wakamupimanga so pa zuŵa la chinkhonde ndi chiŵi, asani wawona kuti nthenda yilivi kufwapuka mu khungu, mzukuru wakamujariyanga mu nyumba mazuŵa ghanyake ghankhonde ndi ghaŵi.

⁶ Ndipo mzukuru wakamupimanga so pa zuŵa la chinkhonde ndi chiŵi. Asani pa malo gho gha nthenda mphakuti bi ndipo nthenda yo yilivi kufwapuka mu khungu, po ndipo mzukuru wakanenanga kuti ngwambura kunguzgika, Nthwakutupa twawaka ndipo iyo wakachapanga saru zake, ndi kuŵa wambura kunguzgika.

⁷ Kweni asani twakutupa to tufwapuka mu khungu, pavuli wati wajirongo ku mzukuru pakutozgeka kwake, wakerutanga so ku mzukuru;

⁸ ndipo mzukuru wakamupimanga, asani twakutupa to twafwapuka mu khungu, po sono mzukuru wakanenanga kuti ngwakunguzgika; ndi makhate.

⁹ “Asani munthu watama ndi makhate ŵakamutoliyanga ku mzukuru;

¹⁰ ndipo mzukuru wakamupimanga ndipo asani mwe kakutupa katuŵa mu khungu, keniko kasanduska cheya kuŵa chituŵa ndipo mu munofu muwoneka kakutupa ko;

¹¹ ndi makhate ghachijariye mu khungu la liŵavu lake. Mzukuru wakanenanga kuti ngwakunguzgika kuti wakamujariyanga mu nyumba cha pakuti ngwakunguzgika.

¹² Ndipo asani mzukuru wawona kuti makhate ghafwapuka mu khungu, kuburumutizga khungu lose la munthu yo, kutuwa ku mutu mpaka ku marundi.

¹³ Sono mzukuru wakamupimanga. Asani makhate ghaburumutizga liŵavu lake lose wakamunenanga kuti ngwakutozgeka ku nthenda yo.

¹⁴ Kweni penipo munofu ukawonekanga twakutupa wakaŵanga wakunguzgika.

¹⁵ Mzukuru wakapimanga munofu wo ndi kunena kuti ngwakunguzgika; munofu ngwakunguzgika chifukwa we ndi makhate.

¹⁶ Kweni asani munofu ung'anamuka so usanduka kuŵautuŵa, munthu yo wakazanga ku mzukuru.

¹⁷ Mzukuru wakamupimanga, asani nthenda yasanduka yituŵa, sono mzukuru wakanenanga kuti munthu wa nthenda yo ngwakutozgeka; watozgeka.

¹⁸ “Ndipo penipo mu khungu la munthu mwe kakutupa ko kapo,

¹⁹ ndipo pa malo ghakakutupa ko patuwa chitufya pamwenga chiŵawo chakufyuŵara, wakajirongonga ku mzukuru.

²⁰ Mzukuru wakapimanga, asani wawona kuti chitufya chasere mukat mu khungu ndipo cheya chasanduka chituŵa, mzukura wakatamulizganga kuti ngwakunguzgika; ndi nthenda ya makhate, yafwatapukiya mu chitufya.

²¹ Kweni asani mzukuru wachipima ndipo weya wapaku cho kuti ngutuŵa cha ndipo kuti wasere mukati mu khungu cha, kweni kuti chiwoneka umampha cha, po ndipo mzukuru wakamujariyanga mazuŵa ghankhonde ndi ghaŵi;

²² asani chithaza mu khungu, po ndipo mzukuru wakanenanga kuti ngwakunguzgika, cho ndi nthenda.

²³ Kweni asani chitufya chijaririya pa malo ghamoza ndipo kuti chithaza cha, iku ndi bamba la chakutupa cho; ndipo mzukuru wakakambanga kuti ngwakutozgeka.

²⁴ “Pamwenga, asani liŵavu le ndi chironda cha moto pa khungu, ndipo munofu ufya wa chironda cho usanduka chiŵawo chiyera pamwenga chituŵa,

²⁵ mzukuru wachipime, asani cheya cha pa chiŵawo chasanduka chituŵa, ndipo chiwoneka kuti chasere mukati mu khungu, ipo ndi makhate, ghatuliya ku bwalo pa bamba lakufya ndi moto, ndipo mzukuru wakanenanga kuti ngwakunguzgika, ndi nthenda ya makhate.

²⁶ Kweni asani mzukuru watichipima ndipo cheya cha pa chiŵawo kuti nchituŵa cha kuti chasere mukati mu khungu cha, kweni kuti chiwoneka umampha cha, mzukuru wakamujariyanga mu nyumba mazuŵa ghankhonde ndi ghaŵi.

²⁷ Wakamupimanga pa zuŵa la chinkhonde ndi chiŵi, asani chiŵawo chithaza mu khungu, po mzukuru wakanenanga kuti ngwakunguzgika, ndi nthenda ya makhate.

²⁸ Kweni asani chiŵawo chijaririya pa malo ghamoza pe, kuti chithaza cha mu khungu kuti chiwoneka umampha cha, iku nkhakutupa ka kufya, ndipo mzukuru wakanenanga kuti ngwakuphotoka pakuti ndi bamba la moto.

²⁹ “Asani munthurumi pamwenga munthukazi we ndi nthenda pa mutu pamwenga ku chilezo,

³⁰ mzukuru wayipime nthenda yo; asani yisanirika kuti yikusere mukati kurutiya pa khungu ndipo sisi lake nda manjani ndi lakonda, mzukuru watamulizge kuti ngwakunguzgika, nchiŵawo, ndi makhate gha ku mutu pamwenga ku chilezo.

³¹ Ndipo asani mzukuru wapima nthenda yo ya chiŵawo ndipo kuti yawoneka yakusere kurutiya khungu cha, ndipo mulivi sisi lifipa mwaku yo; sono mzukuru wakamujariyanga mu nyumba munthu yo wa nthenda ya chiŵawo, kwa mazuŵa ghankhonde ndi ghaŵi,

³² pa zuŵa la chinkhonde ndi chiŵi mzukuru wamupime so, asani chiŵawo chilivi kuthaza ndipo mulivi mukati mwake sisi lakufyuŵara, ndipo chiŵawo chiwoneka kuti chasere mukati kurutiya khungu cha,

³³ sono wakajimetanga; kweni kuti wakametanga pa chiŵawo cha, ndipo mzukuru wakamujariyanga mu nyumba wa nthenda ya chiŵawo yo mazuŵa ghanyake ghankhonde ndi ghaŵi;

³⁴ pa zuŵa la chinkhonde ndi chiŵi mzukuru wakapimanga chiŵawo cho asani chilivi kuthaza mu khungu ndipo kuwoneka kuti chilivi kurutiya khungu, iku mzukuru wakanenanga kuti ngwakutozgeka.

³⁵ Kweni asani chiŵawo chithaza mu khungu pavuli pa kutozgeka kwake,

³⁶ iku mzukuru wakamupimanga ndipo asani chiŵawo chathaza mu khungu, mzukuru kuti wakapenjanga kuwona sisi lakufyuŵara cha; ngwakunguzgika.

³⁷ Kweni asani mu maso gha mzukuru chiŵawo chapimika kuti chithaza cha, sisi lifipa layamba kumepo, iku nthenda yamara, ngwa kutozgeka.

³⁸ “Asani munthurumi pamwenga munthukazi we ndi viŵawo pa khungu lapa liŵavu, viŵawo vituŵa,

³⁹ mzukuru wamupime, asani viŵawo pa khungu lapa liŵavu vye ndi utuŵa wakuvurumutiya, iku ndi duzga lo latupa pa khungu; ngwakutozgeka.

⁴⁰ “Asani sisi la munthu lametuka pa mutu wake ndipo we ndi phara pa mutu, ngwakutozgeka.

⁴¹ Asani sisi la munthu lametuka pa mutu ndi mumphepete mwa mutu wake, ngwakutozgeka.

⁴² Kweni asani pa phara lapa mutu pakati pamwenga pa phara lapa maso pa mutu wake pe chiŵawo chiyera mbwenu ndi makhate ghafwapuka pa phara lapa mutu pakati pamwenga pa phara lapa maso pa mutu wake.

⁴³ Viyo mzukuru wakamupimanga asani utuŵa wa chiŵawo cho ngwakufyuŵara pa phara lapa mutu pakati pamwenga lapa maso pa mutu wake, nge nkhawonekeru ka makhate gha khungu lapa liŵavu,

⁴⁴ ngwa makhate, ngwakunguzgika; mzukuru wamukambe kuti ngwakunguzgika; nthenda yapa mutu wake.

⁴⁵ “Yo we ndi nthenda ya makhate wavwarenge malizwazwa, sisi laku mutu wake liŵenge lambura kumanga, ndipo wabenekeriyenge mlomo wake wanena, ndi kukambura kuti, ‘Wambura kutozgeka, wambura kutozgeka’;

⁴⁶ wakaŵanga wambura kutozgeka nyengo yose yo wakaŵiyanga ndi makhate ngwambura kutozgeka; wakajanga pakuyija, ndipo watenere kuja, kubwalo kwa ugoŵi.

⁴⁷ “Asani nthenda ya makhate ye mu chakuvwara, manyi ncha weya, pamwenga cha bafuta,

⁴⁸ manyi ncha uzu wakumika pamwenga wakupinjika, wa cha bafuta pamwenga cha weya, pamwenga mu chikopa pamwenga chinthu chose chakuchitika ndi chikopa,

⁴⁹ asani nthenda yirongo mtundu wa mphetamani uyera mu chakuvwara, pamwenga mu uzu wakumika pamwenga wakupinjika, pamwenga mu chikopa mu chinthu chose chakuchitika ndi chikopa, ndi nthenda ya makhate, ndipo yilongoreke ku mzukuru.

⁵⁰ Ndipo mzukuru wakayipimanga nthenda yo, ndi wakabenekeriyanga cho che ndi nthenda kwa mazuŵa ghankhonde ndi ghaŵi;

⁵¹ wakapimanga so nthenda yo pa zuŵa la chinkhonde ndi chiŵi. Asani nthenda yachapaliya mu chakuvwara mu Uzu wakumika pamwenga wakupinjika pamwenga mu chikopa, manyi chingaŵa chikopa cha nchitu uli, nthenda yo ndi makhate ghakwambukiya; nchambura kutozgeka.

⁵² Ndipo wawochenge chakuvwara cho nanga nthenda yingaŵa mu uzu wakumika pamwenga wakupinjika, cha weya pamwenga cha bafuta, pamwenga chose cho ncha chikopa, chifukwa ndi makhate ghakwambukiya, chocheke mu moto.

⁵³ “Ndipo asani mzukuru wapima nthenda, ndipo yilivi kuchapaliya mu chakuvwara, mu uzu wakumika pamwenga wakupinjika, pamwenga chinthu chose chakuchitika ndi chikopa,

⁵⁴ mzukuru waŵalanguliye; kuti ŵasuke chinthu cho mwe nthenda ndipo ŵachijariyenge mazuŵa ghanyake so ghankhonde ndi ghaŵi;

⁵⁵ pavuli wachiwone chinthu cho che ndi nthenda chati chasukika. Asani malo gho ghakoreka ndi nthenda chati chasukika. Asani malo gho ghakoreka ndi nthenda kuti ghasintha mtundu wake cha, chingana nthenda kuti yachapaliya cha, nchakunguzgika chinthu cho; ndipo mukachiwochanga mu moto, nanga malo gho ghakoreka ndi makhate ghe mukati pamwenga kubwalo.

⁵⁶ “Kweni asani mzukuru wapima, ndipo nthenda yiwoneka bi yati yasukika, waparuwepo pa malo gha chakuvwara cho, pamwenga pa chikopa pamwenga uzu wakumika pamwenga wakupinjika;

⁵⁷ ndipo asani yiwoneka so mu chakuvwara mu uzu wakumika pamwenga wakupinjika, pamwenga mu chinthu chose chakuchitika ndi chikopa, yachapaliya, muchoche ndi moto, che ndi nthenda.

⁵⁸ Kweni chakuvwara, cha uzu wakumika pamwenga wakupinjika, pamwenga chinthu chose cho nchakuchitika ndi chikopa mwaku cho nthenda yatuwa mwati mwachisuka, chikasukikanga so kachiŵi, ndipo chikatozgekanga.”

⁵⁹ Ili ndi dangu la nthenda ya makhate mu chakuvwara cha weya pamwenga cha befuta, pamwenga mu uzu wakumika pamwenga wakupinjika, pamwenga mu chinthu chose chakuchitika ndi chikopa pakuchinena kuti nchakutozgeka pamwenga nchambura kutozgeka.