ŴaLevi 12 - Tonga Bible 1986

Kutozgeka kwa ŵanthukazi

¹ Ambuya angunena ndi Mosese,

² “Kamba ku ŵaYisraele, asani munthukazi wazuwuka ndipo wapapa mwana munthurumi, iyo wakaŵanga wambura kutozgeka mazuŵa ghankhonde ndi ghaŵi; uli mpha nyengo yake ya masambi; wakŵanga wambura kutozgeka.

³ Ndipo pa zuŵa la chinkhonde ndi chitatu khungu lake lasongo likachinjikanga.

⁴ Kutuwa po wakarutiliyanga mazuŵa machumi ghatatu pachanya ghatatu (33) mu luji lakuphotoka kwake; kuti wakakwaskanga chinthu che chose chakupaturika cha, chingana nkhuza mu nyumba yakupaturika mpaka penipo mazuŵa ghakutozgeka kwake ghafiskika.

⁵ Kweni asani wapapa mwana munthukazi, wakaŵanga wambura kutozgeka ŵasabata ŵaŵi uli mpha nyengo yake ya masambi; ndipo wakakuyakiyanga mu luji la kutozgeka kwake mazuŵa machumi ghankhonde ndi limoza pachanya ghankhonde ndi limoza (66).

⁶ “Ndipo penipo mazuŵa gha kutozgeka kwake ghafiskika, manyi pa mwana munthurumi, pamwenga munthukazi, wakatoliyanga ku mzukuru pa khomo la hema lakuwunganamo mberere ya chirimika chimoza ya mpasku wakocha, ndi kachiunda ka nkhunda pamwenga ka njiŵa kuchitiya mphepeska yapa ulakwi;

⁷ ndipo iyo wakaperekanga cho paurongo pa Ambuya ndi kumupepeske; viyo ndimu munthukazi wakatozgekiyanga ku masambi ghake. Ili ndi dangu lapa munthukazi wakupapa mwana munthurumi pamwenga munthukazi.

⁸ Ndipo asani wangatondeka kusaniya mberere, iku wato tunjiŵa tuŵi, pamwenga tuviunda twa nkhunda, kamoza ka mpasku wakocha ndi kanyake ka mpasku wapa ulakwi, ndipo mzukuru wakamupepeskiyanga, viyo wakaŵanga wakuphotoka.”