ŴaLevi 1 - Tonga Bible 1986

Mipasku yakocha

¹ Ambuya angudana Mosese ndipo angurongoro nayo kutuwa mu hema lakuwunganamo, anguti,

² “Ukambe ku ŵaYisraele, ndipo uŵanene kuti, penipo munthu yose waku imwe watuza ndi mpasku ku Ambuya, uŵe wa ng'ombe yakutuwa ku miskambu.

³ “Asani mpasku wake ndi mpasku wakocha wakutuwa ku mskambu, wakaperekanga yinthurumi yambura kalema, wakayiperekiyanga pa khomo la hema lakuwunganamo, alinga kuti walondereke paurongo pa Ambuya.

⁴ Wakalarikanga janja lake pa mutu wa mpasku wakocha, ndipo ukarondekiyanga iyo kuŵa wakumuŵeyerere.

⁵ Ndipo wakabayanga nkhuzi yo paurongo pa Ambuya; ndipo ŵana ŵaku Aroni ŵazukuru wo, ŵakarongonga ndopa zo, ndipo ŵakawazganga kwakuzunguliya uku ndi uku pa jochero la sembe lo le pa khomo pa hema lakuwunganamo.

⁶ Ndipo ŵakafuŵanga nkhuzi yo, yakuperekeka ndi yakudumurika vipikita-vipikita;

⁷ ŵana ŵaku Aroni mzukuru ŵakaŵikanga moto pa jochero, ndi kuŵikapo nkhuni kwakululika pachanya pa moto,

⁸ ndipo ŵakalalikanga vipikita, mutu, ndi mafuta mu mululiku pachanya pa nkhuni zo ze pa moto pa jochero lo;

⁹ kweni vya mukati mwake ndi marundi ghake ŵakasukanga ndi maji. Ndipo mzukuru wakawochanga vyose pa jochero kuŵa mpasku wakocha, mpasku wakupereka wapa moto, fungu lakukondweska Ambuya.

¹⁰ “Asani wapereka mpasku wakocha wachakuturiya ku mskambu, mberere pamwenga mbuzi, wakaperekanga yinthurumi yambura kalema.

¹¹ Ndipo wakayibayiyanga kuchiri ku nkhonde kwa jochero paurongo pa Ambuya, ndipo ŵana ŵaku Aroni ŵazukuru ŵakadiranga ndopa zake pa jochero kwakuzunguliya.

¹² Ndipo wakayidumuwanga vipikitavipikita, ndi mutu wake, ndi mafuta ghake, ndipo mzukuru wakavilalikanga mu mululiku pachanya pa nkhuni zo ze pa moto pa jochero.

¹³ Kweni vya mukati ndi marundi wakasukanga ndi maji. Ndipo mzukuru wakaperekanga vyose ndi kuvyocha pa jochero, ndi mpasku wakocha, mpasku wakupaskika wap moto, ndi mpasku wa fungu lakukondweska Ambuya.

¹⁴ “Asani mpasku wake ku Ambuya ngwakocha wa viyuni, iku wakazanga ndi mpasku wake wa nkhunda pamwenga viunda.

¹⁵ Ndipo mzukuru wakazanga nacho ku jochero ndi kudumuwako mwakunyongolo mutu wake, ndi kuchiwocha pa jochero. Ndopa zake zikasululiyanga kurwande limoza la jochero.

¹⁶ Ndipo iyo wakatuzgangapo chidukuluku ndi mavungwa, ndi kwachivitaya pafupi ndi jochero kuchiri ku vuma, pa malo gha choto.

¹⁷ Wakaparuwanga vipapiku vyake kweni kuti wayiphwatuwenge cha. Ndipo mzukuru wakayiwochanga pa jochero, pachanya pa nkhuni zo ze pa moto; ndi mpasku wakocha, mpasku wakuperekeka wapa moto, fungu lakukondweska Ambuya.”