Wakutaula 9 - Tonga Bible 1986

Wamampha ndi muheni watuvwa vyenivyo. Wani navyo vyakupaska Ambuya kwakukondwa

¹ Kweni vyose ivi ndinguviŵika pa mtima, kwesa vyose, kuti murunji ndi wazeru ndi nchitu zawo ŵemu manja ghaku Chiuta; munthu kuti waziŵa cha kuti manyi nchanju pamwenga tinkhu. Chinthu chose paurongo pawo nchawaka.

² Pakuti chinthu chimoza chifikiya paku wose, ku murunji ndi muheni, wamampha ndi wawuyu, ku wakuphotoka ndi wambura kuphotoka, kwaku yo wapereka sembe ndi yo wareka kupereka sembe. Nge ndimo waliri munthu wamampha, ndimo waliri wakwananga; ndipo wakurapa rapu wayana ndi yo watopa rapu.

³ Ichi nchawuyu mwaku vyose vyo vichitika panu pasi, kuti chinthu chimoza chifikiya kwaku wose; ndipo so mitima ya ŵanthu yazaza ukazuzi, kufuntha kwemu mitima yawo po ŵeche ndi umoyo, ndipo, pavuli ŵaruta ku ŵakufwa.

⁴ Kweni yose yo wakubatikana ndi ŵamoyo wose wenacho chigomezgu, pakuti garu wamoyo ngwamampha kwakuruska nkharamu yakufwa.

⁵ Chifukwa ŵamoyo ŵaziŵa kuti ŵakafwanga, kweni ŵakufwa kuti ŵaziŵa kanthu cha nanga ndi mphoto nayo ŵalivi; ndipo mbakuruwika.

⁶ Chanju chawo, tinkhu lawo, ndi sanji yawo vyamara kale, ndipo kuti ŵendi phande so cha muyaya mwaku vyose vyo vichitika mu charu chapasi.

⁷ Rutanga, karghenge kurgha kwako ndi likondwa, ndi kumwa vinyo wako mu chimwemwe cha mtima; pakuti Chiuta wakuzomerezga kale nchitu zako.

⁸ Mazuŵa ghose vivwalo vyako viŵenge vituŵa; mutu wako ureke kukavuka mafuta.

⁹ Kondwanga ndi umoyo pamoza ndi muwoli wako yo utanja, mazuŵa ghose, gha umoyo wako wawaka wo wakupaska pa charu, pakuti lenilo ndilo phande lemu umoyo ndi mu nchitu yako yo usuzgika nayo panu pasi.

¹⁰ Chose cho janja lako lasaniya kuchita, chitanga ndi nthazi yako; pakuti kulivi nchitu pamwenga maghanaghano pamwenga kuziŵa pamwenga vinjeru mu muunda mwenimo ukarutanga.

¹¹ Ndinguwona so kuti panu pasi maphara kuti gheku ŵapusu cha, nanga ndi nkhondo kuti yaku ŵanthazi cha, nanga nkhurgha ku ŵazeru, nanga mbusambasi ku ŵakuwamo nanga mbulemu ku zing'ombwa cha: kweni nyengo ndi mwaŵi viŵiya kwaku wose.

¹² Pakuti munthu kuti waziŵa nyengo yake cha. Ulaka nge ndi somba zo zakoreka mu chirepa chiheni, ndipo nge nthuyuni to twawira muchiŵana, viyo ŵana ŵa ŵanthu ŵakuwiya mu nyengo yiheni, po yituŵawiya kwa mabuchibuchi.

¹³ Ndawona so chakuwoniyapo ichi cha vinjeru panu pasi, ndipo chikuŵa chikuru ukongwa kwangu.

¹⁴ Kwenga msumba umana wakujamo ŵanthu ŵamanavi. Ndipo karonga mukuru wanguza kurwana nawo, ndi kuwuzinga, wanguwuzenge malinga ghakuru.

¹⁵ Kweni mungusanirika mu msumba munthu wa vinjeru mukavu, ndipo iyo ndi zeru yake wangupozomoska msumba. Kweni ndipuuli pengavi yumoza yo wangukumbuka munthu mukavu yuwa.

¹⁶ Kweni ine ndititi vinjeru vyamampha kwakuruska nthazi, nanga zeru ya munthu mukavu njakunyozeka, ndi mazu ghake ngambura kuvwika.

¹⁷ Mazu gha wazeru ghakuvwikiya mu chisisi ngamampha, kwakuruska kubangura kwa wakuwusa mukati mu ŵazereza.

¹⁸ Vinjeru vyamampha kwakuruska vidya vya nkhondo, kweni mulakwi yumoza watananga vyamampha vinandi.