Wakutaula 7 - Tonga Bible 1986

Kuvwa vyakuŵaŵa nkhwamampha zeru nkhujikanizga mwaku vyo

¹ Mbiri yamampha njamampha kwakuruska mafuta ghakuzirwa; ndipo zuŵa lakufwiya, liruska zuŵa la kuwiya.

² Nkjwamampha kuruta ku nuumba ya maliro kwakuruska kuruta ku nyumba ya madghera; pakuti uwu mbumari wa ŵanthu wose, ndipo ŵamoyo ŵakachiŵikanga pa mtima.

³ Chitima nchamampha kwakuruska kuseka, pakuti ndi kuzimbwa kwa chisku mtima usangaruka.

⁴ Mtima wa wazeru wemu nyumba ya maliro: kweni mtima wa wakupusa wemu nyumba yakuseka.

⁵ Nkhwamampha munthu kuvwiya kuchenya kwa ŵavinjeru kwakuruska kuvwa sumu za ŵazereza.

⁶ Pakuti nge ndimo minga yitekenyeke pasi pa mumphika, ndimo kuliri kuseka kwa ŵazereza; ichi nachu so nchawaka.

⁷ Nadidi suzgu yipusiska wazeru; ndipo chimbundi chitanangiska mtima.

⁸ Umari wa kanthu ngwamampha kuruska chiyambo chake; ndipo wakufwasa mu mzimu ngwamampha kuruska wakujikuzga mu mzimu.

⁹ Reka kukaripa ruŵi, pakuti kukaripa kugona mu chifuŵa cha ŵakupusa.

¹⁰ Ungakambanga cha kuti, “Chifukwa chine mazuŵa gha kale ghenga ghamampha kwakuruska yagha?” Pakuti kafumbidu yaka ufumba kuti nkhakutuliya mu vinjeru cha.

¹¹ Vinjeru vyamampha pamoza ndi chihara, nchanduwu kwaku wo ŵawona lumwi.

¹² Pakuti kuvikiliya vinjeru kwe nge nkhuvikiliya ndrama; ndipo chanduwu cha kuwamo nchakuti vinjeru visunga umoyo waku mweniyo wenavyo.

¹³ Ghanaghana nchitu yaku Chiuta; ndiyani wangaziŵa kunyoroska chenicho iyo wabendezga?

¹⁴ Mu zuŵa la kusakata kondwanga, ndipo mu zuŵa la soka ghanaghana; Chiuta wachita chimoza ulaka nge nchinyake mwakuti munthu wareke kusaniya kanthu ko kaŵengepo, pavuli pake.

¹⁵ Ine ndawona vinthu vyose mu umoyo wangu waŵaka; walipo munthu murunji yo wafwiya mu urunji wake, ndipo walipo munthu muheni yo wajaririya mu umoyo wake mu nchitu zake ziheni.

¹⁶ Ungarutizganga kuŵa murunji, ndipo ureke kujiŵika wazeru kwakuruska; chifukwa chine unkhumba kujiparghang'a wamweni?

¹⁷ Ungarutizganga kuŵa muheni, nanga nkhuŵa muzereza; chifukwa chine unkhumba kufwa nyengo yako yenga yindafike?

¹⁸ Nkhwamampha kuti uchikoreske ichi, ndipo ureke kutuzgapo janja lako paku cho; chifukwa yo watopa Chiuta wakatuwangmo mwaku vyo vyose.

¹⁹ Vinjeru vipaska nthazi ku munthu wazeru kwakuruska ŵakuwusa chumi wo ŵemu mu msumba.

²⁰ Nadidi palivi munthu murunji pa charu chapasi yo wachita umampha ndi kuti walakwa cha.

²¹ Ungategherezganga kwaku vyose vyo ŵanthu ŵakamba cha, vinu ungavwa mteŵeti wako wachikutemba;

²² mtima wako uziŵa kuti iwe nawe waŵatembapo ŵanyake nyengo zinandi.

²³ Vyose ivi ndavipima ndi vinjeru; ndinguti, “Nkhaŵanga wa vinjeru,” kweni kwenga kutali ndi ine.

²⁴ Cho chiriko, che kutali ndi ndimba, ndimba yitali ukongwa ndiyani wangachisaniya?

²⁵ Ndingung'anamuka mtima wangu kuziŵa ndi kusanda ndi kupenja zeru kuti ndisaniye unandi wa vinthu ndi kuziŵa uheni wa ŵazereza ndi kupusa ko nkhufuntha.

²⁶ Ndipo ndingusaniya chinthu chakuŵaŵa ukongwa kuruska nyifwa, ndi munthukazi yo mtima wake ndi viŵana ndi mikwau, mweniyo manja ghake ndi unyoro; yo wakondweska Chiuta wapozomokenge kwaku iyo, kweni wakulakwa watoreka ndi iyo.

²⁷ Ehe, ichi ndicho ndikusaniya, watiti wakutaula, kusazga ichi pa chinyake mwakuti ndisaniyi unandi,

²⁸ cho mtima wangu waŵa wakupenjapenja, kweni kuti ndachisaniya cha. Mukati mu ŵanthurumi chikwi (1,000) ndasaniyamo munthu yumoza, kweni mu ŵanthukazi chikwi (1,000) kuti ndasaniyamo yumoza cha.

²⁹ Awonani, ichi chija ndicho ndasaniya, kuti Chiuta wangumulenga munthu wakunyoroka, kweni iwo ndiwo ŵapenjapenja nthowa zinandi.