Wakutaula 6 - Tonga Bible 1986

Chingana Chiuta wampaska munthu vyose vyo wakhumba kweni mtima kuti uguta navyo cha

¹ Ulipo uheni wo ndawona panu pasi ndipo wanyekezga ukongwa pa ŵanthu.

² Munthuyo Chiuta watimupaska usambasi, vyuma, ndi ulemu, mwakuti, kuti wakavuka kanthu cha paku vyose vyo wakhumba, kweni ndipuuli Chiuta kuti watimpaska nthazi yakukondwe navyo cha, kweni mlendo ndiyo wakondwa navyo; nchawaka ichi; ichi nchironda chakupweteka.

³ Asani munthu wabala ŵana machumi pe chumi, ndi kuŵa ndi umoyo wa virimika vinandi, ndi kuti mazuŵa ghavirimika vyake nganandi, kweni umoyo wake kuti ukondwere mu vinthu vyamampha cha, ndipo so muwunda nawo walivi, ndikamba kuti wakupapika kwambura kufikapo pa nyengo yake ngwamampha ukongwa kuruska iyo.

⁴ Pakuti watuza mu chawaka ndi kututa mu mdima, ndipo zina lake libisika mu mdima;

⁵ ndipo so kuti wawona lumwi cha pamwenga kuziŵa kanthu ke kose; kweni ndipuuli wasaniya chipumulu kuruska iyo.

⁶ Nanga wangagona virimika vikwi viŵi (2,000) kweni kuŵa ndilikondwa lamampha cha asi wose waruta ku malo ghamoza?

⁷ Nchitu yose ya munthu nja pa mlomo wake, kweni ndipuuli chirghoko chake kuti chiguta cha.

⁸ Pakuti wazeru wendi chanduwu uli kuruska wakupusa? Ndipo mukavu wendi kane yo waziŵa kujiko umampha pa maso pa ŵamoyo?

⁹ Nkhwamampha kulereska ndi maso kwakuruska kuyingayinga kwa linweka, ichi nachu so nchawaka ndi suzgu ya mtima.

¹⁰ Cho chose chikuŵapo chikudanika kale zina, ndipo kukuziŵikwa mo munthu waliri, kuti waziŵa kulimbana ndi yo ngwanthazi kuruska iyo cha.

¹¹ Pa makani ghanandi, pe vyawaka vinandi nanga munthu waruskakunji?

¹² Chifukwa ndiyani waziŵa cho nchamampha ku munthu penipo waja mazuŵa ghamanavi gha umoyo wake wa ŵaka, wo wati wujumpha nge ndi mduzi? Pakuti ndiyani yo wangamunene munthu cho chikaŵangako pavuli pake panu pasi.