Wakutaula 5 - Tonga Bible 1986

Marangu ghakupambanapambana gho ŵanthu ŵa umoyo uno ŵangaphwere

¹ Sunga kenderu kako pakututa ku nyumba yaku Chiuta; kundere kufupi kutegherezga nkhwamampha kwakuruska kupereka sembe za wakupusa; pakuti kuti ŵaziŵa cha kuti ŵachita uheni.

² Ungarongoronga kwakuthaŵiriya cha, nanga nkhuzomerezga mtima wako kupusumphiska mazu pakurongoro paurongo paku Chiuta, chifukwa Chiuta we kuchanya, iwe we panu pasi, pa chifukwa ichi mazu ghako ghaŵenge ghamanavi.

³ Pakuti loto lituza ndi nchitu zinandi, ndipo mazu gha muzereza ghendi vyakurongoro vinandi.

⁴ Penipo urapa rapu kwaku Chiuta, reka kuswera pakulifiska; chifukwa iyo kuti wendi likondwa mu ŵazereza cha. Fiska cho warapa.

⁵ Nkhwamampha kuti ureke kurapa rapu kwakuruska kuti urape ndi kutondeka kufiska.

⁶ Ungazomerezganga cha mlomo wako kukurongozge ku kwananga, ndipo ureke kurongoro pa maso pa muthenga kuti kwenga kubuda; wakalipiyengenji Chiuta pa mazu ghako, ndi kuparghang'a nchitu za manja ghako?

⁷ Pakuti po maloto ghangana, mazu ghawaka nagho ghatuŵa ghanandi: kweni iwe wopanga Chiuta.

⁸ Asani uwona kunyekezgeka kwa ŵakusawuka ndi kurandizgika kwa cheruzgu ndi urunji mwa chiwawa pa chigaŵa chinyake cha charu ungazizwanga paku ichi cha; pakuti wamazaza yo walereskeka ndi wamazaza wakuruska iyo, ndipo so walipo wamazaza wakuruska iwo.

⁹ Kweni mwaku vyose, charu ndi munda wakulimika nchanduwu cha karonga.

¹⁰ Yo watanja ndrama kuti wakagutiskikanga ndi ndrama cha; nanga ndiyo watanja usambasi ndi chanduwu, ichi nachu so nchawaka.

¹¹ Po katundu watandana, wakumurgha nawo ŵatandana so, nanga watumwanduliyanji mweneko kweni kuviwona ŵaka ndi maso ghake?

¹² Twakunowa nthulo twa wakutakataka, kaya waturgha vimana pamwenga vinandi; kweni kuguta kwa musambasi kuti kukamugoneskanga tulo cha.

¹³ Ulipo uheni wakuŵaŵa wo ndawona panu pasi: ngwakuti usambasi upweteka mweneko wakuwusunga,

¹⁴ usambasi wo unguparghang'ika pakumuziya soka; ndipo pakupapa mwana, walivi kanthu mu janja lake.

¹⁵ Nge ndimo wangutuliya mu nthumbo ya anyina wankhuli mo wanguziya ndimo wakarutiyanga so, ndipo kuti wakapinganga kanthu kapa mlimu wake cha, ko watenere kupinga mu janja lake.

¹⁶ Ichi nachu mbuheni wakuŵaŵa: ulaka nge ndimo wanguziya, ndimu so wakarutiyanga, kumbi wendi chanduwu uli mo wangutakatakiya mu suzgu yake,

¹⁷ ndi kumara mazuŵa ghake ghose mu mdima ndi chitima, mu visuzgu vinandi ndi matenda ndi kukweŵeskeka?

¹⁸ Ehe cho ine ndawona kuŵa chamampha ndi chakwenere nkhurgha ndi kumwa ndi kuŵa ndi likondwa mu nchitu zose zo munthu wasuzgika nazo mu mazuŵa ghamanavi gha umoyo wake gho Chiuta wamupaska panu pasi, pakuti lenilo ndilo phande lake.

¹⁹ Munthu yose yo Chiuta wamupaska usambasi ndi vyuma ndi mazaza ghakukondwe navyo, kuronde phande lake ndi kusekere mu nchitu yake; ichi nchawezi chaku Chiuta.

²⁰ Chifukwa kuti wakaghakumbukanga viŵi cha mazuŵa gha umoyo wake pakuti Chiuta watumusungiya mu likondwa la mtima wake.