Wakutaula 3 - Tonga Bible 1986

Vyose vye ndi nyengo yake, Chiuta ndiyo wakuviŵika vyose

¹ Kanthu kose kendi nyengo yake, ndi nyengo ya kafukwa ke kose pasi pa charu:

² nyengo yakupapikiya, ndi nyengo yakufwiya; nyengo yakupandiya, ndi nyengo yakuzuliya cho chingupandika;

³ nyengo yakubayiya, ndi nyengo yakuchizgiya; nyengo yakubwanganduliya pasi, ndi nyengo yakuzenge;

⁴ nyengo yakuliriya, ndi nyengo yakuseke; nyengo yakutenjere, ndi nyengo yakuviniya;

⁵ nyengo ya kutaya mya, ndi nyengo yakuwunjika mya pamoza; nyengo yakupakata, ndi nyengo yakureka kupakata;

⁶ nyengo yakupenje, ndi nyengo yakutayiya; nyengo yakusunga, ndi nyengo yakupong'a;

⁷ nyengo yakuparuliya, ndi nyengo yakusone; nyengo yakuja chisisi, ndi nyengo yakurongoro;

⁸ nyengo yakwanja, ndi nyengo yakutinkha; nyengo ya nkhondo, ndi nyengo ya chimangu.

⁹ Nchine chanduwu cha wanchitu mu kutakataka kwake?

¹⁰ Ndawona suzgu yo Chiuta wapaska ku ŵana ŵa ŵanthu kuti ŵasuzgike nayo.

¹¹ Wachita vinthu vyose kuŵa vyakutowa mu nyengo yake; waŵika so umuyaya mu mtima wa munthu kweni ndipuuli palivi yo waziŵiska cho Chiuta wachita kutuliya ku kwamba mpaka ku umari.

¹² Ndiziŵa kuti kulivi kamampha kwaku iwo kwakuruska kukondwa ndi kusekere mwaku iwo ŵija po ŵeche ndi umoyo;

¹³ ndipo so nchawezi chaku Chiuta ku munthu kuti yose warghe ndi kumwa ndi kukondwere mu nchitu zake zose.

¹⁴ Ndiziŵa kuti chose cho Chiuta wachita chikajaririyanga muyaya; kuti kakasazgikiyangako kanyake nanga nkhutuzgapo kanthu kanyake kwaku cho cha; Chiuta wachichita ichi mwakuti ŵanthu wopenge paurongo pake.

¹⁵ Cho chiriko chinguŵako ndi kale, cho chikaŵangako chinguŵako kale; ndipo Chiuta wapenja cho chadikiskikiya kutali.

¹⁶ Ndipo so ndinguwona panu pasi kuti mu malo gha cheruzgu uheni wenga mwenimuwa, ndi mu malo gha urunji, namu so ukazuzi wenga mwenimuwa.

¹⁷ Ndingunena mu mtima wangu, Chiuta wakeruzganga ŵarunji ndi ŵaheni, pakuti wamika nyengo pa kafukwa ke kose, ndi pa nchitu ye yose.

¹⁸ Ndingunena mu mtima wangu vya pa ŵana ŵa ŵanthu, kuti, Chiuta watiŵesa, kuŵarongo iwo kuti nkhanthu cha kweni nyama za mu dondo.

¹⁹ Pakuti cho chiwiya ŵana ŵa ŵanthu ndi cho chiwiya nyama nchimoza; nge ndimo chimoza chifwiya ndimo chinyake nacho chifwiya. Vyose vyendi mvuchi umoza, ndipo munthu kuti waruskako ku vinyama cha; pakuti vyose vyawaka.

²⁰ Vyose virata ku malo ghamoza vyose vyakutuliya ku fuvu, ndipo vyose viwere so ku fuvu.

²¹ Ndiyani waziŵa kuti mzimu wa munthu ukwere kuchanya ndi mzimu wa nyama usikiya kusi ku charu?

²² Mu chifukwa ichi ndinguwona kuti kulivi kamampha kwakuruska kuti munthu wakondweriyenge nchitu yake, pakuti lenilo ndilo phande lake; ndiyani yo wakamutoriyanga kukuwona vyo vituza pavuli pake?