Wakutaula 2 - Tonga Bible 1986

Vya umoyo uno visintha kukondweska mtima

¹ Ndingurongoro mu mtima wangu, “Zanga sono, ndikwesenge ndi likondwa; kondwanga wamweni.” Kweni ehe, ichi nachu so chenga chawaka.

² Ndingukamba za kuseka, “Nkhufuntha,” ndi za likondwa, “Kumbi lendi kanthu uli?”

³ Ndingupenja ndi mtima wangu mo ndingasangaruskiya liŵavu langu ndi vinyo, mtima wangu weche kundirongozga mu vinjeru ndimo ndingakore, uzereza, mpaka penipo ndinguwona cho nchamampha ku ŵana ŵa ŵanthu kuchita pasi pa mtambo mu mazuŵa ghamanavi gha umoyo wawo.

⁴ Ndinguchita nchitu zikuru; ndinguzenga zinyumba ndingujipandiya mphereska;

⁵ ndingujilimiya minda ndi malo ghakupumuliyamo, ndipo ndingupandamo miti yose ya vipasi ya mitundu mitundu.

⁶ Ndingujichitiya viziŵi vya maji ghakudiriya lisuwa la miti yakume.

⁷ Ndingugula ŵaŵanda ŵanthurumi ndi ŵanthukazi, ndenga ndi ŵaŵanda ŵakuwiya mu nyumba yangu; ndipo ndenga so ndi usambasi ukuru wa miskambu ndi vyakuŵeta, kuruska wose wo ŵenga mu Yerusalemu ine ndenga ndindaŵeko.

⁸ Ndinguwunjikiya so siliva ndi golide ndi usambasi wa ŵakaronga ndi vigaŵa vya charu ndinguŵa ndi ŵakumba ŵanthurumi ndi ŵanthukazi, ndi mbiligha zinandi, likondwa la munthu.

⁹ Viyo ndinguŵa mukuru kuruska wose wo ŵenga mu Yerusalemu paurongo pangu; ndipo so vinjeru vingujaririya mwangu.

¹⁰ Ndipo cho chose maso ghangu ghangukhumba kuti ndingughajara cha; ndengavi kukanizga mtima wangu ku likondwa le lose pakuti mtima wangu ungusaniya likondwa mu nchitu zangu zose, ndipo iyi yenga mphoto ya mukutakataka kwangu kose.

¹¹ Sono ndingupima vyose vyo manja ghangu ghanguchita ndi nchitu zo ndingusuzghika nazo kuchita, ndipo ehe, chose chenga chawaka ndi suzgu ya mtima, ndipo kwengavi chanduwu pa charu chapasi.

¹² Viyo ndingung'anamuka kughanaghana vinjeru, kufuntha, ndi uzereza; chifukwa wangachitanji munthu yo watuza pavuli pa karonga? Nchenicho pe wakuchita kale.

¹³ Penipo ndinguwona kuti vinjeru viruska uzereza nge ndimo ukweru uruskiya mdima.

¹⁴ Maso gha munthu wa vinjeru ghe mu mutu wake, kweni wakupusa watenda mu mdima, ndipuuli ndingupanikizga kuti chinthu chimoza chituziya kwaku wo wose.

¹⁵ Penipo ndingurongoro mu mtima wangu, “Chenicho chiwiya wakupusa chikawiyanga so ine; nanga chifukwa nchine ine ndaŵa wavinjeru ukongwa?” Ndipo ndingukamba mwaku ndamweni kuti ichi nachu so nchawaka.

¹⁶ Pakuti wazeru kuti wakumbukika nyengo zose kuruska wakupusa cha pakuwona kuti mu mazuŵa gha ghatuza wose ŵakaluwikanga. Kumbi wa vinjeru watufwa uli nge ngwakupusa?

¹⁷ Viyo ndinguwutinkha umoyo, chifukwa cho chikuchitika mu charu chapasi nchakundipaska chitima pakuti vyose vyawaka ndipo ndi suzgu ya mtima.

¹⁸ Ndingutinkha milimu yangu yose yo ndingusuzgika nayo panu pasi, pakuwona kuti nditenere kuyisiliya kwaku mweniyo wakazanga pavuli pangu;

¹⁹ ndipo ndiyani waziŵa manyi wakawanga wa vinjeru pamwenga muzereza? Ndipuuli wakawusanga pa milimu yangu yose yo ndasuzgika nayo pakuchita vinjeru vyangu. Ichi nachu so nchawaka.

²⁰ Viyo ndingung'anamuka ndi kutaya mtima wangu pasuzgu yose ya kutakataka kwangu panu pasi,

²¹ chifukwa panyake munthu yo wachita nchitu mu vinjeru ndi kuwamo ndi ung'ombwa watenere kusiya vyose mwakuti munthu yo walivi kusuzgikiyapo ndiyo wakondwenge navyo. Ichi nachu so nchawaka ndipo mbuheni ukuru.

²² Kembi munthu wendi kane pa nchitu zose ndi visuzgu vyake mwaku vyenivyo wasuzgika navyo panu pasi?

²³ Pakuti mazuŵa ghake ghose ghazaza ndi urwirwi, ndipo nchitu yake ndi vitima; nanga mbusiku mtima wake kuti upumuwa cha. Ichi nachu so nchawaka.

²⁴ Kulivi chamampha chakumwenere munthu kwakuruska kuti warghe ndi kumwa ndi kusaniya likondwa mu nchitu yake. Ichi nacho ndinguchiwona, nchakutuliya ku janja laku Chiuta;

²⁵ pakuti pade paku Iyo ndiyani wangargha pamwenga ndiyani wangaŵa ndi likondwa?

²⁶ Chifukwa ku munthu yo watimukondweska, Chiuta wapaska vinjeru, kuwamo, ndi chimwemwe; kweni ku mulakwi wapaska suzgu ya kuwunjika ndi kuyereka, mwakuti wapereke kwaku mweniyo Chiuta wakondwa nayo. Ichi nachu so nchawaka ndi suzgu ya mtima.