Wakutaula 12 - Tonga Bible 1986

¹ Kumbuka so Mlengi wako mu mazuŵa gha unyamata wako, ghenga ghandazi mazuŵa ghaheni, ndi virimika vyenga vindafike, penipo wazamukamba kuti, “Ndilivi likondwa mwaku vyo.”

² Vyenga vindafipiskike, lumwi ndi ukweru ndi mwezi ndi zinyenyezi ndi kuwere vuli kwa mitambo vuwa yati yamara;

³ mu zuŵa lo ŵakusunga nyumba ŵazamumbwambwanthiya, ndi ŵanthurumi ŵanthazi ŵazamupeteka, ndi ŵakupera ŵakarekanga chifukwa mbamana, ŵakulereska pa madangazi ŵachitenge chidima,

⁴ makhomo ghamu ŵagurwi ghajarika; penipo kayowozi wakupera pa mphe walopwa, ndipo yumoza wayuka pa mazu gha kayuni, ŵana ŵanthukazi wose ŵakumba ŵakasiski kiyanga pasi;

⁵ ŵatopa so cho nchapachanya, ndipo vyakofya vye mu nthowa; muti wa zobala uchita maluŵa, phanana waruta kwakuzendazenda ndipo linweka limara; chifukwa munthu waruta ku muzi wake wa muyaya, ndipo wakutenje watendatenda ŵaka mu ŵagurwi.

⁶ Lamba wa siliva wenga wandadumuke, pamwenga mbali ya golide yenga yindasweke, chiŵiya chenga chindaphwanyike pa chiziŵi, pamwenga mkombelo wenga undafyoke pa chisima cha maji,

⁷ fuvu liwere ku dongo nge ndimo linguŵiya, ndipo mzimu uwere kwaku Chiuta yo wanguwupaska.

⁸ Nchaŵaka, vyaŵaka watiti wakutaula chose nchaŵaka.

Kafukwa keneko ka munthu nkhopa Ambuya ndi kusunga marangu ghawo

⁹ Pakuŵa wazeru, Wakutaula wangusambizga ŵanthu vinjeru, kupima ndi kusanda ndi kululika zinthazi zinandi kwa rwana likuru ukongwa.

¹⁰ Wakutaula wangupenja kusaniya mazu ghakukondweska, ndipo kwakunyoroska wangulemba mazu ghakuneneska.

¹¹ Kukamba kwa wazeru kwenge ndi mivwi yakurasa, mazu ghakusankhika gho ghakuperekeka ndi mliska yumoza ghe nge ndi mzumali yakukhomeka ndi nthazi.

¹² Mwana wangu, uchenje ndi kanthu ke kose kakuruska ivi, kulemba mabuku ghanandi kuti kumarenge cha, ndipo kusambira ukongwa nkhujivukiska liŵavu.

¹³ Umari wa makani; vyose vyavwika muwope Chiuta, ndipo sungani marangu ghake; pakuti ichi ndicho ndi nchitu yose ya munthu.

¹⁴ Chifukwa Chiuta wakatoriyanga nchitu yose ku cheruzgu, pamoza ndi kanthu ke kose kakubisika, manyi nkhamampha pamwenga kaheni.