Wakutaula 11 - Tonga Bible 1986

Tichitenge vyamampha le pakureka kuziŵavya mawa

¹ Upong'e chakurgha chako pa maji, pakuti ukachisaniyanga ghatakuti ghajumphapo mazuŵa ghanandi.

² Pereka chigaŵa ku ŵankhonde ndi ŵaŵi pamwenga ŵankhonde ndi ŵatatu, pakuti kuti uziŵa cha mbuheni wa mtundu uli uŵenge pa charu chapasi.

³ Asani mitambo yazaza vuwa, yitiyipunguliya pa charu; ndipo asani muti wawa ku malaŵi pamwenga ku nkhonde, pa malo po muti, wawiya, ndipo ukagonanga.

⁴ Yo walereska mphepo kuti wakamijanga cha; ndipo wakughanaghana ndi mitambo kuti wakavunanga cha.

⁵ Nge ndimo ureke kuziŵiya mzimu uchiza muviwanga mukati mu nthumbo ya munthukazi wakuŵa ndi mwana, ndimo ureke kuziŵiya nchitu zaku Chiuta yo wachita vinthu vyose.

⁶ Umije mbeu yako ndi mlenjilenji, ndipo ndi mazulo ureke kuko janja lako; pakuti kuti uziŵa cha zo zandanenge, izi pamwenga ziya pamwenga vinu zose ziŵi zikaŵanga zamampha kwakukozgana.

⁷ Ukweru ngwamampha, ndipo nchakukondweska ku maso kuwona lumwi.

⁸ Pakuti asani munthu watuŵa ndi umoyo wa virimika vinandi, wakondwenge mwaku vyose vyo, kweni watenere kukumbuka kuti mazuŵa gha mdima ghakaŵanga ghanandi. Chose cho chituza nchawaka.

Wamunyamata ukondwe, kweni ujinozge, ukumbuke kuti nyifwa yituza

⁹ Kondwanga, muyamata, mu unyamata wako ndipo mtima wako ukondwenge mu mazuŵa gha unyamata wako; yendanga mu nthowa za mtima wako ndimu kuwona kwa maso ghako. Kweni ziŵa kuti Chiuta wakutoriyenge ku cheruzgu mwaku vyose ivi.

¹⁰ Tuzgamo suzgo mu mtima wako, ndipo taya kutali kuŵaŵa mu liŵavu lako; pakuti uhurwa ndi ulitema wa umoyo vyawaka.