Wakutaula 1 - Tonga Bible 1986

Vya panu pasi vyawaka

¹ Mazu gha Wakutaula, mwana waku Davidi, karonga wamu Yerusalemu.

² Chawaka vyawaka, watiti Wakutaula, chawaka vyawaka! Chose nchawaka.

³ Nchine chanduwu cha munthu pa nchitu zose zo wasuzgika nazo panu pasi?

⁴ Mgonezi uruta, ndipo mgonezi utuza, kweni charu chijaririya muyaya.

⁵ Lumwi lituwa ndipo lumwi lisere, lithaŵiriya ku malo ko lituliya.

⁶ Mphepo yiputa ku malaŵi, ndi kuzunguliya ku nkhonde; yizunguliya-zunguliya yiruta, ndipo pakuzunguliya kwake mphepo yiwe so.

⁷ Misinji yose yichimbiriya ku nyanja, kweni nyanja kuti yizaza cha, ku malo ko misinji yituliya, ndiku yiwere so.

⁸ Vinthu vyose vivukiska; munthu kuti wangaziŵa kukonkhoska cha; jiso kuti liguta mu kulereska cha, nanga ndi gutu kuguta mu kuvwa.

⁹ Cho chengako ndicho chikaŵangako, ndipo cho chikuchitika ndichu chikachitikanga; kulivi chinthu chifya pa charu cha pasi.

¹⁰ Kumbi chiripo chinthu paku chenicho kungakambika kuti, “Awonani, ichi nchifya?” Chengako kale, ifwe tenga tindaweko.

¹¹ Vyakale kuti vikumbukika cha, ndipo kuti vikakumbukikanga cha vinthu vyo vikachitikanga kunthazi, vyo vikaŵangako mwaku wo ŵakazanga kuvuli.

Uŵaka wa vinjeru

¹² Ine Wakutaula ndenga karonga wa ŵaYisraele mu Yerusalemu.

¹³ Ndipo ndingupereka mtima wangu kupenja ndi kusanda mwa zeru vyose vyo vichitika pasi pa mtambo; ndi nchitu yambura kukondweska yo Chiuta wapereka ku ŵana ŵa ŵanthu kuti ŵasuzgike nayo.

¹⁴ Ndawona chinthu chose cho chachitika panu pasi, ndipo ehe, chose nchawaka ndi suzgu ya mtima.

¹⁵ Cho nchakubende kuti chingaziŵa kunyoroka cha, ndipo cho palivi kuti chingaziŵa kuŵerengeka cha.

¹⁶ Ndingurongoro mu mtima wangu, “Ndaŵa wa vinjeru vikuru, kuruska wose wo ŵenga mu Yerusalemu ine ndindaŵeko; ndipo mtima wangu waziŵa vikuru vya zeru ndi kuwamo.”

¹⁷ Ndipo ndingupereka mtima kuziŵa vinjeru, ndi kuziŵa kufuntha ndi uzereza. Ine ndikupanikizga kuti ichi nachu so ndi suzgu ya mtima.

¹⁸ Pakuti mu vinjeru vinandi mwe vitima vikuru, ndipo yo wakuzga vinjeru wakuzga chitima.