ŴaHebere 8 - Tonga Bible 1986

Yesu Mzukuru Widu Mura

¹ Kweni mwaku vyenivyo vyakambika fundu yeneko njeniyi: te nayo Mzukuru Mura waviyo, mweniyo waja pasi ku marghe gha chitengu chaufumu ukurukuru mu machanya,

² mliska wa vyakupaturika ndi wa chihema chenecho, chenicho wangujintha Mbuya, munthu cha.

³ Pakuti mzukuru mura yose wamikikiya kwachipereka mipasku ndi so visopu: viyo kukhumbikwa kuti mwenuyu waŵe ndi kanthu ko wangapereka.

⁴ Ndipo asani wenga panupasi, mphanyi kuti wanguŵa mzukuru kose cha, po ŵalipo ŵakupereka mipasku mwa dangu.

⁵ Weniwo ŵatataliya chandiru ndi chizgezge cha vyakuchanya, nge ndimo ŵangulangulikiya Mosese po wenga pafupi kuzenga hema lo: chifukwa watiti, “Alere, kuti uchite vyose uli ndi chandiru cho chingurongoleke iwe mu phiri lo.”

⁶ Kweni sono wafikako ku umirizi wakuzungura, uli ndimo so ndi mwendamukati wa chipanganu chakuruska, chenicho chalangulika pa mapanganu ghakuruska.

⁷ Chifukwa asani chipanganu chakudanga chiya chinguŵa chambura kafukwa, mphanyi kuti ghangupenjeka cha malo gha chachiŵi.

⁸ Chifukwa pakuŵasuska watiti, “Awonani, mazuŵa ghatuza, atiti Ambuya, ndipo ndifiskenge ku nyumba yaku Yisraele ndi ku nyumba yaku Yuda chipangano chifya:

⁹ kwakulingana ndi chipangano chenicho ndinguchita ndi auskeu cha mu zuŵa lo ndinguŵakole janja kwachiŵatuzga mu charu cha Egipiti, pakuti iwo ŵengavi kujaririya muchipanganu changu, ndipo ine ndingureka kuŵaphwere, atiti Ambuya.

¹⁰ Pakuti chenichi nchipanganu chenicho ndichitenge ndi nyumba yaku Yisraele pavuli pa mazuŵa yagha, atiti Ambuya: ndiŵikenge marangu ghangu mu vinjeru vyawo, ndipo pa mitima yawo ndighalembenge; ndipo ndiŵaŵiyenge Chiuta, ndipo iwo ŵandiŵiyenge khamu:

¹¹ ndipo kuti ŵarunguchizganenge chamunthu yose ndi mwanase wake, ndi munthu yose ku mbali wake, kuti, ‘Ziŵanga Ambuya.’ Pakuti wose ŵakandiziŵanga ine, kutuwa ku mumana mpaka ku mura waku wo.

¹² Pakuti ndiŵiyenge walisungu ku maubendezi ghawo ndipo vilakwa vyawo kuti ndikumbukenge so cha.”

¹³ Mu kukamba, chipanganu chifya, wakoteska chakudanga cho. Kweni chenicho chakukota ndi nchakukaramba che pafupi kuzirimitiya.