ŴaHebere 6 - Tonga Bible 1986

¹ Viyo pakusiya mazu ghakutendeka gho ghaku Kristu, titinthimikiye ku mfisku wo; kujarika so cha chiŵanja cha chipe cha kutuwako ku nchitu zakufwa, ndi cha chivwanu chamwaku Chiuta,

² cha sambizgu la vibatizo, ndi cha chiŵika cha manja, ndi cha chiyuka cha ŵakufwa, ndi cha cheruzgu chamuyaya.

³ Ndipo tikachitanga chenichi, asani Chiuta wazomera.

⁴ Chifukwa kuchiri kwaku ŵeniwo ŵangweruskika kali, ndi ŵangulaŵa mpasku wakuchanya, ndipo ŵangusangana mu Mzimu Wakupaturika,

⁵ ndi ŵangwesa nkhani yamampha yaku Chiuta, ndi so nthazi za mgonezi wo ukazanga,

⁶ ndipo mbakudezukako, nkhwakutondeka kuŵawerezge so ku chipe; mwakuti ŵajipayikiya so Mwana yo waku Chiuta, ndi kumlengeska pakweru.

⁷ Chifukwa charu cho chamwa vuwa yo yingi'yangi'ya pake panandi, ndi nchakume sungwi zakwenere ŵeniwo chiŵalimikiya, chironde chitumbiku kutuwa kwaku Chiuta:

⁸ kweni cho nchakume minga ndi ŵakankhandi, nchakupatika ndipo che pafupi kutembeka; kamaridu kaku chenicho nkhocheka.

⁹ Kweni, mwaŵakwanjiwa, titoŵeke ndi imwe vyamamphako ndi vyakuyana ndi utaski, chingana tikamba viyo.

¹⁰ Chifukwa kuti Chiuta ngwambura urunji cha kuruwa nchitu yinu ndi chanju cho mungurongole zina lake, po munguteŵete ŵakupaturika wo, ndi muchaŵateŵete.

¹¹ Ndipo tinweka kuti munthu yose waku imwe warongonge phamphu lenilo pe ku uzali wa chigomekezgu mpaka ku umari:

¹² alinga mungaŵanga ŵakudodoma cha, kweni ŵakwezga ŵeniwo mu chivwanu ndi unkhunthiya mbakuhara mapanganu.

Phanganu lakuneneska laku Chiuta

¹³ Chifukwa Chiuta, wachipangana ndi Abrahamu (penipo wengavi kuziŵa kumrapiya ndi muraku), wangurapa ndi yija, wakuti,

¹⁴ “Nadidi kutumbika ndikutumbikenge, ndi kwandaniska ndikwandaniskenge.”

¹⁵ Ndipo viyo wanguti wakunthiyapo, wangufikapo pa phanganu lo.

¹⁶ Chifukwa ŵanthu ŵarapiya muraku ndipo rapu lakwachikhozge liŵamariya suskano yose.

¹⁷ Nako viyo chiuta, pakukhumba kurongole limu ku ŵakulihara phanganu uwura masinthika wa chipangu chake, wangudumulizgamo ndi rapu:

¹⁸ alinga kuti mu vinthu viŵi vizira masinthika, mwaku vyo nkhwambura machitika kuti Chiuta waname, tiŵe ndi kachiskidu kakukho, taŵakuthaŵiriya kukoreska chigomekezgu chakujarikikiya ifwe:

¹⁹ chigomekezgu chenicho te nacho nge ndi ndondowa ya mzimu, chakuneneska ndi chakukho, ndi chakuserere mwaku cho che mukati mu chijaru cho;

²⁰ mwenimo uli ndi mdanjizgi waserere pa chifwa chaku ifwe Yesu, yo waŵiya ku muyaya Mzukuru Mura mwa ndondomeku yaku Melkizedeke.