ŴaHebere 4 - Tonga Bible 1986

¹ Viyo topenge, vinu kikuli, lati lajapo phanganu la kuserere mu chipumulu chake, wangawoneka yumoza wa mwaku imwe kupereŵepo.

² Chifukwa nadi tataulikiya evangeli uli ndi ŵeniŵa: kweni mazu gho ŵanguvwa ghengavi kuŵanduliya kanthu, pakuŵavi kusazgikana ndi chivwanu mu ŵakughavwa.

³ Chifukwa taŵakuvwana tisere mu chipumulu cho; nge ndimo wanene, “Uli ndimo ndingurapiya mukandundu kangu, ‘Kuti ŵamsere cha mu chipumulu changu:’ ” chingana nkhuti nchitu zo zingufiskika kutuliya ku kukhazikika kwa charu.

⁴ Chifukwa kunyake wakamba ndi zuŵa la chinkhonde ndi chiŵi lo, “Ndipo Chiuta wangupumuwa ku nchitu zake zose pa zuŵa lachinkhonde ndi chiŵi.”

⁵ Ndipo wanguti so pa malo yagha, “Kuti ŵamsere cha mu chipumulu changu.”

⁶ Viyo pakuwona kuti anyake ŵaserenge mwaku cho, ndipo kuti ŵeniwo ŵangutaulikiya kali mazu ghakunozga ŵanguseremo cha chifukwa cha mtafu,

⁷ wateme so zuŵa linyake, “Le,” pakukambiya mwaku Davidi, pavuli pa nyengo yikuru yakuti, ulimdimo kwaneneke kali, “Le, asani muvwnge liu lake. Mungangangamiskanga mitima yinu.”

⁸ Chifukwa asani Yoswa wanguŵapumuzga, mphanyi kuti Chiuta wanguŵakambiya pavuli cha ndi zuŵa linyake.

⁹ Viyona, chipumuwa cha sabata chajariya ku khamu laku Chiuta.

¹⁰ Chifukwa yo wasere mu chipumulu chake, iyo nayo wapumuliya ku nchitu zake, uli ndimo Chiuta wangupumuliya ku nchitu zake.

¹¹ Viyo tipamphuke kusere mu chipumulu chiya, alinga kuti wareke yumoza kuwiyamu chandiru chenicho pe cha mtafu.

¹² Chifukwa ngamoyo mazu ghaku Chiuta, ndi ngakuchita, ndingakuthwa kwakuruska lipanga lose la uyi kosekose, ndipo ghaporota mpaka ku mugaŵiru wa umoyo ndi mzimu, ndi marunga ndi mdinthi, ndi ngapusu kuteska maghanagha nondi maknumbu gha mtima.

¹³ Ndipo palive chakulengeka chambura kuwoneka paurongo pake: kweni vyose vye nkhuli ndi mwazi ku maso ghaku mweniyo te ŵachifukwa nayo.

Yesu Mzukuru Mura wakuruska wose

¹⁴ Viyo pakuŵa ndi Mzukuru Mura mukuru, yo waporota mu machanya, Yesu, Mwana yo waku Chiuta, tikoreske chizomerezgu chidu.

¹⁵ Chifukwa kuti te nayo cha mzukuru Mura wambura nthazi kuvwiyapo nafwe mu maunthomboru ghidu; kweni yo weseka mwaku vyose kwakulingana nafwe, kweni kwambura vilakwa.

¹⁶ Viyo tiŵandike ndi chiganga ku chitengu cho cha wezi kuti tironde lisungu, ndi tisaniye wezi wakutovye mu nyengo yakwenere.