ŴaHebere 11 - Tonga Bible 1986

Chivwanu

¹ Kweni chivwanu nchimbondu cha vyakugomekezgeka vyo, chirozgu cha vinthu vyambura kuwoneka.

² Chifukwa awaku chenicho ŵaraŵara wo ŵangusimikizgikiya.

³ Ndi chivwanu titeska kuti vyaru vyo vyachitika ndimazu ghaku Chiuta, viyo kuti cho chiwoneka chirive kuŵapo kutuwa ku vyakuwoneka.

⁴ Ndi chivwanu Abelu wangupereka kwaku Chiuta mpasku wamamphako kwakuruska Kaini, mwaku weniwo wangusimikizgikiya kuŵa murunji, Chiuta iyo wachimsimikizgiya pa mipasku yake; mwaku chenicho nacho chingana wakufwa wacharongoro.

⁵ Ndi chivwanu wangusamiskika Hanoke kuti wareke kuwona nyifwa; ndipo kuti wangusanirika cha, pakuti Chiuta wangumsamiska: chifukwa wenga wandasamiskike, wangusimika kuti wamkondweska Chiuta.

⁶ Kweni kwambura chivwanu kutondeka kumkondweska: chifukwa yo watuza kwaku Chiuta wakavwananga kuti waliko, ndipo kuti ngwakuŵalambula ŵeniwo ŵatumpenjeska.

⁷ Ndi chivwanu Nowa, wati wachenjezgeka ndi vinthu vyo vyenga vindawoneke, kwa uwopa Chiuta wangarongoso ngaraŵa kwachitaska ŵamu nyumba yake; mwaku chenicho wanguchisuska charu, ndipo wanguŵa muhara wamu urunji wa chivwanu.

⁸ Ndi chivwanu Abrahamu, wanguti wadanika, wanguvwiya kuti watuwemo kuya ku malo ghenigho wakarondanga ngenchihara; ndipo wangutuwa, wambura kuziŵa ko wayanga.

⁹ Ndi chivwanu wangutandara ku charu cho cha phanganu, ulaka nchilendo, wakuja mu mahema, pamoza ndi Yisaki ndi Yakobe, ŵakuhariya pamoza nayo phanganu lenilo;

¹⁰ chifukwa walerezenga msumba wo wakuŵa ndi viŵanja, waku weniwo mzengi ndi chata ndi Chiuta.

¹¹ Ndi chivwanu Sara iyo nayo wanguronde nthazi yakuzuukiya mbeu pavuli pa nyengo ya uŵisi, pakuti wangumpima wamagomekezgeka mweniyo wangupangana;

¹² ndiviyo ŵangupapikako ku yumoza, ndi iyo nge ngwakufwa, mu unandi nge ndi nyenyezi za kuchanya, ndi uli ndi mchenga wo wapa likumba la nyanja, wambura maŵerengeka.

¹³ Mu chivwanu ŵangufwiya yaŵa wose, ŵambura kuronde mapanganu gho, kweni ŵakughalereske ndi ŵakughatauzgiya kutari, ndi ŵakuzomera kuti ŵengaŵalendo ndi ŵayinga pa charu.

¹⁴ Chifukwa ŵeniwo ŵakamba ghaviyo, ŵarongo kuti mbakupenja charu cha uskeu.

¹⁵ Ndipo asani ŵakumbukanga charu chiya kweniko ŵangutuwa, mphanyi ŵanguŵa nayo nyengo yakuwere kweniko.

¹⁶ Kweni sono ŵanweke chamamphako, ndicho chakuchanya: ndiviyo Chiuta walive soni nawo, kutamulika Chiuta wawo: chifukwa waŵarongosole msumba.

¹⁷ Ndi chivwanu Abrahamu, wacheseka wangupereka Yisaki nge ndi mpasku: ndipo mweniyo wangurondapo mapanganu wangupereka mwana wake wakuwa yija;

¹⁸ paku mweniyo kunguneneka, “Mwaku Yisaki yikudanikiyenge mbeu.”

¹⁹ Pakuti wangupima kuti Chiuta wenga wanthazi kumyuska, chingana nkhu ŵakufwa; kutuwa kweniko nako wangumronde mu ntharika.

²⁰ Ndi chivwanu Yisaki wangutumbika Yakobe ndi Esau, kuchiri ku vyakukhasa kuŵapo navyo.

²¹ Ndi chivwanu Yakobe, wachifwa, wanguŵatumbika ŵana ŵaku Yosefe uyu ndi uyu; ndipo ŵangulambiya pa songu ya ndodu yake.

²² Ndi chivwanu Yosefe, wachifwa, wangukamba ndi chituwa cha ŵana ŵaku Yisraele; ndipo wangulanguliya vya pa viwangwa vyake.

²³ Ndi chivwanu Mosese wati wawa wangubisika ndi ŵapapi ŵake myezi yitatu, pakuti ŵanguwona kana kenga kakunozga; ndipo kuti ŵangopa cha lamulu la karonga yo.

²⁴ Ndi chivwanu Mosese, wati waŵa mura, wangukana kutamulika mwana wa munthukazi waku Farao;

²⁵ wangusankha kuchitikiya uheni pamoza ndi khamu laku Chiuta kwakuruska kuŵa kwanyengo ndi malikondwa gha uheni;

²⁶ ndipo wangweska tozu lo laku Kristu yo uromba ukuru ku usambasi wamu Egipiti pakuti wangulereskako ku chilambula-mphotu.

²⁷ Ndi chivwanu wangureka Egipiti, kwambura kopa kandundu ka karonga yo; chifukwa wangukunthiyapo, uli ngwakumuwona yo ngwambura mawoneka.

²⁸ Ndi chivwanu wanguchita phaska, ndi chiwazga cha ndopa so, alinga kuti yo wanguŵananga ŵakupapika-danga wangaŵakwaska cha.

²⁹ Ndi chivwanu ŵangwambuka Nyanja Yiyera yo nge mpha yumu: yeniyo ŵa Egipiti nawo pakwesa kwambuka ŵangubira.

³⁰ Ndi chivwanu malinga ghaku Yeriko ghanguwa pasi ghanguti ghazingirizgika mazuŵa ghankhonde ndi ghaŵi.

³¹ Ndi chivwanu Rahabe, munthukazi mureŵi yo, wengavi kunangikiya pamoza ndi ŵamtafu wo, pakuti wanguronde skoli ndi chimangu. Ndipo nkhakambanga so chine?

³² Chifukwa nyengo yindipereŵiyenge kukonkhoma vyaku Gideoni ndi Baraki, ndi Samsoni, ndi Jefta, ndi Davidi ndi Samuele ndi ŵamchimi wo.

³³ Weniwo mu chivwanu ŵangugoda maufumu, ŵanguchita urunji, ŵangufikapo pa mapanganu, ŵangujara milomo ya zinkharamu,

³⁴ ŵanguzimwa nthazi ya moto, ŵangupozomoka ku uyi wa lipanga ŵanguthaziskika mu unthomboru, ŵanguŵa ŵakukhwima mu nkhondo, ŵanguthereska maŵanja gha ŵalendo.

³⁵ Ŵanthukazi ŵangutondoleka ŵambura kuronde uwombozi; alinga ŵafikepo pa chiyuka chakuruska.

³⁶ Ndipo ŵanyake ŵangweseka ndi matozu ndi malikhwechu, nadidi so, ndi magoŵa ndi ulinda.

³⁷ Wangupong'eka mya ŵanguchekeka, ŵangweseka, ŵangubayika ndi lipanga: ŵanguwurawura ŵakuvwara vikopa vya mberere ndi vikopa vya mbuzi: ŵakavu, ŵakusuzgika, ŵakuchitika uheni,

³⁸ ŵeniwo charu chengavi kuŵenere, ŵakuyingayinga mu mabozwa ndi mu mapiri ndi mu zimphanji, ndi mu vibuwu vya charu.

³⁹ Ndipo yaŵa wose, ŵati ŵasimikizgika mu chivwanu, ŵengavi kulironde phanganu lo,

⁴⁰ pakuti Chiuta watirongosole limu ifwe chinthu chamamphako, alinga kuti kwambura ifwe ŵangafiskika cha.