ŴaFilipi 3 - Tonga Bible 1986

Kukondwere mu Mbuya

¹ Pakumariya mwa ŵabali ŵangu, kondwereni mu Mbuya. Kumlembiyani vyenivyo pe kuti kutindivuska cha, ndipo nge nkhwaku imwe nkhwakukhozga.

² Cheŵani nawo ŵagaru wo, cheŵani ndi ŵanchitu ŵaheni, cheŵani ndi ŵakujichinja ku liŵavu,

³ chifukwa ifwe te ŵamchinju ŵa uneneska wo mbakusopa Chiuta mu Mzimu, ndi mbakutumbwiya mwaku Kristu Yesu, ndi ŵambura kugomekezga mu liŵavu.

⁴ Chingana ine ndingagomekezga mu liŵavu. Asani munyake watiti wendi kafukwa kakugomekezge mu liŵavu, iku ine ukongwako:

⁵ ndawakuchinjika pa zuŵa lachinkhonde ndi chitatu, wa khamu laku Yisraele, wa fuku laku Benjamini, muHebere wamu ŵaHebere, kuchiri ku langulu mufarisi,

⁶ uli nkhu pamphu, wakuŵemba eklesiya lo; nge nkhu urunjiwamu chilangulu, nda wambura kafukwa.

⁷ Kweni vyo vyose vingundiŵiya vyanduwu, ndavyesa chitayiku chifukwa chaku Kristu.

⁸ Nadi ndapima vyose kuŵa chitayiku chifukwa cha mziŵiru wakuzungura pakumuthoŵa Kristu Yesu Ambuyangu. Chifukwa chaku iyo ndataya, vyose, ndipo ndituvyesa mitawi alinga kuti ndanduwe Kristu,

⁹ ndipo kuti ndisanirike mwaku iyo, pakuŵa ndi urunji wangu wamu chilangulu cha, kweni wo we mu chivwanu cha mwaku Kristu, urunji wakutuwa kwaku Chiuta wo uyegeme, pa chivwanu icho,

¹⁰ kuti ndimziŵe iyo, ndi nthazi yo ya chiyuka chake, ndikuti ndisangane nayo mu vyakukomwa vyake, kuŵa nge ndiyo mu nyifwa yake,

¹¹ mwakuti vinu nane ndingafikapo pa chiyuka cho cha ku ŵakufwa.

¹² Kuti ndikamba kuti ichi ndikuronde kali pamwenga kuti nde wakuphotoka kali cha; ndilimbalimba kuti chiŵi changu, chifukwa Kristu Yesu wandisanduska kuŵa wake.

¹³ Mwa ŵabali, kuti ndijipima ine kuti ndachibwakiya sono cha; kweni chinthu chimoza ndichita, pakujiruwiya vyakuvuli, ndi kutambazukiya ku vyakuurongo,

¹⁴ ndichimbiriya ku chichiri ku mphotu ya mdanu wakuchanya waku Chiuta mwaku Kristu Yesu.

¹⁵ Viyo tose pakuŵa ndi vinjeru tighanaghane chenichi; ndipo asani mughanaghana kamwenga, Chiuta wakavumbuliyenge ko kwaku imwe.

¹⁶ Kweni tiyeni cho taronde tichikoreze mu uneneska.

¹⁷ Mundezge, mwa ŵabali, ndipo ŵathoŵeni wo ŵatenda ulaka ndimo muliri ndi ifwe nge nchikozgu.

¹⁸ Chifukwa ŵatenda ŵanandi, ŵeniwo ndamkambiyani panandi, ndipo sono napu ndawakuliya ndikamba, kuti mbamawongu ŵa mphinjika yaku Kristu.

¹⁹ Ŵeniwo kamaridu kawo nkhutayika, waku ŵeniwo chiuta ndi rufu lawo, ndi unkhankhu wawo we mu soni yawo, wo ŵaghanaghaniya vyapanupasi.

²⁰ Chifukwa ifwe msumba widu ngwa kuchanya, kutuwa kweniko tilindizga Mtaski, Mbuyafwe Yesu Kristu:

²¹ mweniyo wamsanduska liŵavu lidu la kuyuyulika kuti lilinganizgike ndi liŵavu la unkhankhu wake, kwakuyana ndi nthazi yo ye mwaku iyo yeniyo so wathereskiyenge vinthu vyose kwaku iyo mweneko.