ŴaEfeso 2 - Tonga Bible 1986

Kutuwa ku nyifwa kurata ka umoyo

¹ Imwe namwe mwenga ŵakufwa mu mamphuru ndi maulakwi,

² mwaku ghenigho mungwendayenda ulaka ndi mgonezi wa charu chenichi, kwakuzomerezgana ndi fumu ya mitufu ya mude mzimu yo sono watataliyamo mu ŵana ŵa mtafu;

³ mukati mwaku ŵeniwo nafwe so tingujijariya tose mu maulakalaka gha liŵavu lidu, ndi kutataliya makhumbu gha liŵavu ndi maghanaghano, ndipo taŵanga mu kaŵiru ŵana ŵachikaralizga, nge mbakujapo nawo:

⁴ kweni chiuta, pakuŵa msambasi mu lisungu, chifukwa cha chanju chake chikuru chenicho wangwanja nacho ifwe,

⁵ teche ŵakufwa ifwe mu mamphuru, wangutichita ŵamoyo pamoza ndi Kristu iyo (ndi wezi mwataskika),

⁶ ndipo wangutiyuska pamoza nayo, ndi kutijarika pamoza nayo mu vyakuchanya vyo, mwaku Kristu Yesu.

⁷ Alinga kuti mu migonezi yo yikazanga warongonge usambasi ukuru wa wezi wake mu wanangwa kuchiri kwaku ifwe mwaku Kristu Yesu:

⁸ chifukwa ndi wezi mwataskikiya mu chivwanu: ndipo chenicho kuti nchakutuwa kwaku mwaŵeni cha; ndi mpasku waku Chiuta;

⁹ chakutuwa ku zinchitu cha, kuti wareke munthu kujikuzga.

¹⁰ Chifukwa te kachitidu kake, taŵakulengeke mwaku Kristu Yesu ku milimu yamampha, yeniyo wangurongosole limu Chiuta, kuti mwaku yo tendengemo.

Umoza mwaku Kristu

¹¹ Viyo kumbukani kuti kali imwe, mwa ŵaMitundu kuchiri ku liŵavu, ŵakuzumbulika ŵambura kuchinjika ndi cho chizumbulika Mchinju mu liŵavu, wakuchitika ndi manja,

¹² kumbukani kuti pa nyengo yiya mwenga pade pambura Kristu, ŵakugaukako ku ufumu wakuYisraele, ndi ŵalendo ku marayizganu gha chipanganu cho, ŵambura chigomekezgu ndi ŵambura kuziŵa Chiuta mu charu.

¹³ Kweni sono mwaku Kristu Yesu imwe, mwaŵakuŵa kutari kali, mwanderezgeka kufupi mu ndopa zaku Kristu.

¹⁴ Chifukwa ndiyo chimangu chidu, yo wachita viŵi vyo chimoza, ndi wadengenduwa chimati chapakati chakugauwa,

¹⁵ wati wakotole limu mu liŵavu lake umawongu wo, chilangulu nacho cha marangu ghakulamulika; alinga kuti mwaku yija waŵalenge wo ŵaŵi munthu yumoza mufya, ndi kuchata viyo chimangu;

¹⁶ ndipo kuti mu liŵavu limoza wasopeskane wo ŵaŵi kwaku Chiuta mu mphinjika yo, pakubayiya umawongu wo mwenimo:

¹⁷ ndipo wanguzamtauliya chimangu kwaku imwe mwaŵakutari, ndi kwaku wo ŵakufupi:

¹⁸ pakuti mwakuiyo tose taŵaŵi tiŵandikiya mu Mzimu yumoza ku Dada.

¹⁹ Viyo na kuti mweche ŵalendo so cha ndi ŵakutandara, kweni mwe ŵaufumu, ŵanase ŵa ŵakupaturika wo,

²⁰ ndi ŵa ŵanambumba ŵaku Chiuta, pakuzengeka pa chiŵanja cho cha ŵakutumika ndi ŵamchimi, Kristu Yesu mweneko wakuŵa chikhozge-nyondo;

²¹ mwaku mweniyo uzengi wose, pakurunjiskirana limu, ukuwa kuŵa kasopi wakupaturika mu Mbuya;

²² mwaku mweniyo imwe namwe muzengeka pamoza kuŵa chakujamo chaku Chiuta mu Mzimu.