ŴaEfeso 1 - Tonga Bible 1986

¹ Kalata wakutuwa kwaku Paulo, wakutumika waku Kristu Yesu mu khumbu laku Chiuta, ku ŵakupaturika wo ŵe mu Efeso, ŵamagomekezgeka mwaku Kristu Yesu.

² Wezi kwaku imwe ndi chimangu kutuwa kwaku Chiuta Auskefwe ndi Ambuya Yesu Kristu.

Vitumbiku vya Mzimu mwaku Kristu

³ Watumbikike Chiuta yo ndi Wiske wa Mbuyafwe Yesu Kristu, mweniyo watitumbika ndi chitumbiku chose chamzimu mu vyakuchanya mwaku Kristu:

⁴ uli ndimo wangutisankhiya limu mwaku iyo, chenga chindajarikike charu, kuti tiŵenge ŵakupaturika ndi ŵambura kalema paurongo pake.

⁵ Wangutiteme limu mu chanju kuŵa ŵana ŵake mwaku Yesu Kristu, kwakuyana ndi likondwa la khumbu lake,

⁶ kuti urumbike unkhankhu wa wezi wake, mwaku weniwo watisambasiskiya kwawanangwa mu Nkhwanjiwa yo.

⁷ Mwaku mweniyo te nawo uwombozi mu ndopa zake, chireke icho cha mamphuru ghidu, kwakuyana ndi usambasi wa wezi wake,

⁸ wo wangwandaniskiya ifwe mu zeru yose ndi vinjeru,

⁹ pakuti watiziŵiska ungari wa khumbu lake, uli ndi likondwa lake, lenilo wanguteme limu mwaku iyo, kuti,

¹⁰ yati yafika nyengo vinthu vyose, vyakuchanya ndi vyapanupasi vyo, viŵe vimoza mwaku Kristu iyo.

¹¹ Nadi mwaku iyo, mwaku mweniyo so tinguchitika chihara (tati tatemeke limu mu chitema chaku mweniyo watataliya vyose tataliya vyose kwakulingana ndi chipangu cha khumbu lake),

¹² kuti ifwe tiŵenge rumbu la unkhankhu wake, ifwe taŵakugomekezgeka kali mwaku Kristu:

¹³ ndipo kuŵenge viyo kwaku imwe: penipo munguvwa evangeli wa uneneska, uthenga wamampha wo ungumziyani ndi utaski, mungugomezga mwaku Kristu, ndipo Chiuta wangumudindane ndi chidindu chake chamzimu pakumpaskani Mzimu Wakupaturika wo wangupangana,

¹⁴ yo ndi ndindira ya chihara chidu, ku uwombozi wa chiwetu chake ku rumbu la unkhankhu wake.

Rombu laku Paulo

¹⁵ Chifukwa chenichi ine nane, ndatindavwa ndi chivwanu mu Ambuya Yesu cha mwinu, ndipo ndi chanju chinu cha ku ŵakupaturika wose,

¹⁶ kuti ndirekezga cha kumwongiyani, pakumpataulani mu maniniziku ghangu,

¹⁷ kuti Chiuta iyo wa Ambuyafwe Yesu Kristu, Dada wa Unkhankhu, wakupaskeni mzimu wa zeru ndi wa uvumbuzi mu kumuziŵa iyo,

¹⁸ ngati ghangweruskika maso gha mtima winu, alinga kuti muziŵe imwe cho nchigomekezgu cha mdanu wake, wo mbusambasi wa unkhankhuwa chihara chake mu ŵakupaturika wo,

¹⁹ ndiwo ukuru wa nthazi yake kuchiri kwaku ifwe taŵakuvwana, nthazi uli ndi kachitidu ka ukumu wa nthazi zake,

²⁰ zenizo wangutataliya mwaku Kristu, wachimyuska ku ŵakufwa, ndi kumjarika pa janja lake lamarghe mu vyakuchanya vyo,

²¹ pachanya limu pa ufumu wose, ndi mtufu, ndi nthazi, ndi umbuya, ndi zina lose lakuzumbulika, mu mgonezi uno pe cha, kweni so mwaku wo ukazanga,

²² ndipo vyose wanguthereske kusi ku marwayo ghake, ndipo wangupaska iyo kuŵa Mutu pachanya paku vyose ku eklesiya lo,

²³ ndilo liŵavu lake, uzali wo waku mweniyo wazaziya vyose mwaku vyose.