Tito 2 - Tonga Bible 1986

Visambizgu veneko

¹ Kweni kambanga iwe vinthu vyenivyo vitenere sambizgu lizirima lo,

² kuti madoda ghaŵe ghamkana vinyo, ghaziza, gha vinjeru, ghakhome mu chivwanu, mu chanju, mu unkhunthiya:

³ makhongwe nagho kwakulingana ghaŵe ghaulemu mu kajaridu, ghakuparamula cha, chingana ngaŵanda ku vinyo linandi cha, ghakusambizga vyamampha:

⁴ alinga kuti ghalangenge ŵanyakatema kuŵa ŵakuŵanja ŵarumi ŵawo, ŵakuŵanja ŵana ŵawo,

⁵ ŵavinjeru, ŵakongorekwa, ŵakutakataka kwawo ku nyumba, ŵamampha, ŵakuthera ku ŵarumi ŵawo kuti mazu ghaku Chiuta ghangatokoskeka cha;

⁶ majaha nagho kwakulingana chiskanga kuŵa ŵavinjeru:

⁷ mwaku vyose ŵakujirongo chandiru cha milimu yeneko; mu sambizgu lo, ŵakurongo uwurachivuzi, uziza,

⁸ kakambidu kazirima, ko nkhambura masuskika; alinga kuti yo ngwakumikana nafwe walengeskeke, pakuuravi kaheni kakwachisumuliya iwe.

⁹ Chiskani ŵaŵanda kujithereska ku ŵambuyawo, ndi mwaku vyose kuŵa ŵakuŵakhorweska;

¹⁰ kuŵa ŵakuŵiringuwa cha, ŵalitolitoli cha, kweni ŵakurongo ukongorekwa wose wamampha; alinga kuti ŵadyoŵeske chirunguchizgu chaku Chiuta Mtaski widu mu vinthu vyose.

¹¹ Chifukwa wezi waku Chiuta wabulika, wakutole ŵanthu wose utaski,

¹² wakutirunguhizga kuti pakukana uwura uwopa Chiuta ndi malikhumbira gha charu, tijariyenge umoyo kwavinjeru ndi kwaurunji ndi kwauwopa Chiuta mu mgonezi wasono,

¹³ pakulereze chigomekezgu cho chamwaŵindi chiwoneka cha unkhankhu waku Chiuta mkhuru ndi wa Mtaski widu Yesu Kristu;

¹⁴ mweniyo wangujipaska pa chifwa chaku ifwe, alinga kuti wawombolenge ifwe kwamu uchikana marangu wose, ndi wajitozgiyenge khamu lapa mtima wake, lakupamphukiya nchitu zeneko.

¹⁵ Vyenivi kambanga ndi chiskanga ndi panikizganga ndi mtufu wose. Wangakuyuyuwa cha chingana njumoza.