Sumu ya Zisumu 3 - Tonga Bible 1986

Bwezi lake linthukazi la nthengwa lisaniya bwezi lake linthurumi la nthengwa

¹ Ndi usiku pa chita changu ndingumupenja mweniyo mzimu wangu utanja; ndingumupenja, kweni kuti ndingumusaniya cha; ndingumudana, kweni kuti wangundimuka cha.

² “Ndikayukanga sono ndi kwendayenda mu msumba, mu ŵagurwi ndi mu mabwalo; ndimupenjenge, yo mzimu wangu utanja.” Ndingumupenja, kweni kuti ndingumusaniya cha.

³ Ŵalonda pa kwendayenda mumsumba ŵangundisaniya. “Kumbi mwamuwona yo mzimu wangu utanja?”

⁴ Ndinguŵajumpha kanyengo kamanavi, ndinguti ndamusaniya mweniyo mzimu wangu utanja. Ndingumuko, ndipo kuti ndinguzomerezga kumutaya cha mpaka penipo ndingumutore mu nyumba ya ama, mu chipinda chaku mweniyo wakundipapa.

⁵ Ndikurapiskiyani, mwaŵana ŵanthukazi ŵaku Yerusalemu, pa zimphoyo pamwenga pa mphala za mdondo, kuti mureke kusukung'a nanga nkhuyuska chanju mpaka penipo chakhumba.

⁶ Nchine cho chituza kutuliya ku bozwa, nge ndi mzati wa usi wakununkhira fungu la muro ndi vyakusunkhizga, pamoza ndi vyachema vyose vya ufwa wa wakuguliska?

⁷ Ehe, ndi gareta laku Solomoni! Lazingirizgika ndi vinkhara machumi ghankhonde ndi limoza vinkhara vya mu ŵaYisraele,

⁸ wose ŵamangiliya malipanga, ndi zingwazi mu nkhondo, munthu ndi munthu lipanga le pa chigha chake, kumikana ndi ŵakuchiruska ndi usiku.

⁹ Karonga Solomoni wangujichitiya yija gareta ndi miti yaku Lebanoni.

¹⁰ Wanguchita mizati yake ndi siliva, msana wake ndi golide, chakujapo chake ndi saru yakufyuŵara; lingusoneka umampha mukati mwake, ndi ŵana ŵanthukazi ŵaku Yerusalemu.

¹¹ Tuwani, mwaŵana ŵanthukazi ŵaku Zioni, ndipo wonani karonga Solomoni, ndi chifuko cho anyina ŵakumufuka nacho pa zuŵa la nthengwa yake, pa zuŵa la kukondwa kwa mtima wake.