Sumu 99 - Tonga Bible 1986

Kurumba umagomekezgeka waAmbuya

¹ Ambuya ausa, ghatentheme makhamu! Aja ndeku pa maKerubi; charu chapasi chisukunike!

² Ambuya mbara mu Zioni; ndipo mbakutumphulika pachanya pa ŵanthu wose.

³ Ŵarumba zina linu likuru ndi lakofya! Wakupaturika ndiyo!

⁴ Karonga wanthazi, wakwanjaurunji; mwapereka cheruzgu paku Yisraele; mwaŵapaske urunji ndi umampha.

⁵ Tumbikani Ambuya Chiuta widu; sopani paurongo pa chitengo chake! Wakupatruika ndiyo!

⁶ Mosese ndi Aroni ŵenga ŵazukuru ŵake, Samuele wenga yumoza wa ŵakumusopa; wangudana ku Ambuya ndipo iwo anguŵamuka:

⁷ Angurongoro nawo mu mzati wa mtambo; ŵangusunga visimisimi ndi marangu gho anguŵapaska.

⁸ Ambuya Chiuta widu, munguŵamuka ŵanthu ŵinu; munguŵarongo iwo kuti imwe mwe Chiuta yo wagowoke, kweni munguŵalanga chifukwa cha mauheni ghawo.

⁹ Tumbikani Ambuya Chiuta widu, ndipo musopeni pa phiri lake lakupaturika! Ambuya, Chiuta widu ndi mtuwa!