Sumu 97 - Tonga Bible 1986

Kuthokoza nthazi za Ambuya ndi mazaza chawo

¹ Ambuya ndi karonga! Chikondwe charu chapasi! Mwangare, mwa virwa vya mu nyanja!

² Mabingu ndi munkhorwi viŵazingiliya: ufumu wawo ukugarikika pa urunji ndi cheruzgu.

³ Moto undajiya paurongo pawo, kocha ŵakupindikana ŵawo kwakuzunguliya.

⁴ Malimphezi ghawo ghangweruska charu; charu chitighawona ndipo chitenthema.

⁵ Mapiri ghasongonoka nge ndi phura paurongo pa Ambuya ŵa charu chose.

⁶ Machanya ghataula urunji wawo ndipo mafuku ghose ghalereska unkhankhu wowo.

⁷ Wose ŵakusopa vikozgo ŵachita soni, wose wo ŵatijikuzga mu ŵangoza ŵawo; ŵachiuta wose ŵajikama pa maso pawo.

⁸ Ŵanthu ŵamu Zioni mbakukondwa, yisekere misumba yaku Yuda, chifukwa cha vyeruzgu vinu, Ambuya!

⁹ Ambuya mwa ŵanthuzi zose, ndimwe akuwusa ŵa charu chose; mwe akuru kwakuruska ŵachiuta wose.

¹⁰ Ambuya atanja ŵakutinkha uheni: avikiriya maumoyo gha ŵanthu ŵawo, atiŵataska ku nthazi ya ŵaheni.

¹¹ Ukweru uŵaliya pa ŵakurunjika, chimwemwe che pa ŵakutowa mu mtima.

¹² Kondwani mose mwa ŵakurunjika, chifukwa chaku vyo Ambuya achita!