Sumu 95 - Tonga Bible 1986

Kurumba Chiuta ndi kususka kuwura chivwanu

¹ Zaninga, tiyeni timbiye Ambuya; tiyeni tikoŵere jarawi la utaski widu!

² Tiyeni tize paurongo pawo ndi kuwonga, tangare ndi chimwemwe mu sumu za kurumba!

³ Pakuti Ambuya ndi Chiuta mukuru, ndi karonga wanthazi pa ŵachiuta wose.

⁴ Wawusa pa charu chose chapasi, kutuwa ku zimphanji za pasi mpaka ku mapiri ghatali.

⁵ Nyanja njake, ndiyo wanguyilenga; manja ghake ghanguwumba charu chiyumu.

⁶ Zaninga, tikotame ndi kumusopa iyo; tiyeni tigwade paurongo pa Ambuya, Mlengi widu!

⁷ Ndipo ifwe te khamu la uliska wake, ndi mberere za janja lake. Msana wale tegherezgani ku mazu ghake:

⁸ “Rekani kunonopeska mitima yinu nge mpha Meriba, nge ndimo ŵanguŵiya zuŵa liya mu bozwa pa masa.

⁹ Penipa ŵangundesa ndi kundipima, nanga ŵanguwona vyo ndinguŵachitiya.

¹⁰ Virimika machumi ghanayi ndingukwiyiskika ndi mgonezi uwa; rekani ndinguti, ‘Mbanthu ŵakuranda mu mtima! Ŵakana kuvwiya marangu ghangu!’

¹¹ Ndingukwiya ndipo ndinguŵarapiya, ‘Kuti kukaserenga mu chipumulu changu cha.’ ”