Sumu 94 - Tonga Bible 1986

Kuŵeyere Chiuta kuwerezgiyapo thayu ŵanthu ŵake

¹ Ambuya, ndimwe Chiuta wakutaya thayu, vumbuwani ukari winu!

² Ndimwe mweruzgi wa ŵanthu wose, Yukani, paskani ku ŵakujikuzga cho nchakuŵenere!

³ Mpaka zuŵanji ŵaheni ŵakakondwanga? Mpaka zuŵanji, Ambuya?

⁴ Mpaka zuŵanji ŵakajikuzganga ŵakuchita utimbanizi ndi kulankha mu maubendezi ghawo?

⁵ Ŵaphwanya khamu linu, Ambuya; ŵasuzga ŵanthu ŵakumwaŵeni.

⁶ Ŵabaya vyoko ndi ŵamasiya, ŵabaya ndi ŵalendo wo ŵaja mu charu chidu.

⁷ Ndipo ŵatiti, “Ambuya kuti atitiwona cha; Chiuta waku Yisraele kuti wathoŵapo kanthu cha!”

⁸ Mwa ŵanthu ŵangu, nkhupusa uli kwa uzereza ko mweneko? Ndizuŵanji mukaŵanga ndi vinjeru?

⁹ Chiuta ndiyo wakulenga makutu ghidu, kumbi kuti wangavwa cha? Ndiyo wakulenga maso, kumbi kuti wangalereska cha?

¹⁰ Ndiyo wendi mtufu pa mitundu, asi wangatondeka kuŵalanga? Ndi musambizgi wa ŵanthu wose, kumbi kuti waziŵa cha?

¹¹ Ambuya aziŵa maghanaghano gha ŵanthu; aziŵa kuwura kuwamo kwa wo.

¹² Wakukondwa ndi munthu yo imwe Ambuya mutimurunguchizga; munthu yo imwe mutimusambizga dangu linu.

¹³ Kumupumuzga mu mazuŵa gha suzgu, mpaka penipo muunda wakumbikiya ŵaheni.

¹⁴ Ambuya kuti angajowo ŵanthu ŵawo cha; nanga nkhuŵasiya wo mbaku iwo naku cha.

¹⁵ Urunji ukasanirikanga so mu mphara zakweruzgiyamo, ndipo ŵakawurondonga wose wo mbakutuwamu mtima.

¹⁶ Njani yo wangundisoke kumikana ndi ŵaheni? Njani yo wenga kuchiri kwangu kumikana ndi ŵakuchita mphurupuru?

¹⁷ Asani Ambuya awulengevi kundovya, mphanyi ruŵi ndarutanga ku charu cha chisisi.

¹⁸ Po ndatinge, “Rundi langu literemuka,” chanju chinu chakufikapo, Ambuya, chingundikoreze.

¹⁹ Penipo ndi kweŵeka ndi kulampha-lampha, mutindisangaruska ndi kundikondweska.

²⁰ Kuti mukwaskana ndi ŵeruzgi ŵakuvunda cha, wo ŵatata vyeruzgu vyambura dangu.

²¹ Wo ŵapangana kumikana ndi ŵanthu ŵarunji, kweruzgiya ŵambura kunanga ku kubayika.

²² Kweni Ambuya atindipozomoska; Chiuta wangu watindivikiriya.

²³ Wakaŵalanganga chifukwa cha mauheni ghawo, ndi kuŵabwanganduwa chifukwa cha vilakwa vyawo; Ambuya Chiuta widu waŵaparghang'enge.