Sumu 90 - Tonga Bible 1986

BUKU 4 ( Sumu 90—106 ) Chiuta ngwa muyaya, munthu ngwamazuŵa ghamanavi

Rombu laku Mosese

¹ Ambuya mwaŵiya ifwe chakujamo mu migonezi ndi migonezi.

² Ghenga ghandawe mapiri, mwenga mundawumbe charu chapasi, kutuwa ku muyaya mpaka ku muyaya ndimwe Chiuta.

³ Imwe muwezge munthu ku fuvu, ndipo mutiti, “Weni mwa ŵana ŵa ŵanthu!”

⁴ Chifukwa mu maso ghinu virimika chikwi vye nge ndi zuŵa la zana lo larutapo, pamwenga nge ndi mlinda mu usiku.

⁵ Mutiŵakukurwiskiya kutali, ŵenge ndi loto, ŵenge mbuteka wo wame ndi mlenji;

⁶ ukuwa ndipo ubiriŵira, kweni ku mazulo umira ndipo utufwa.

⁷ Tiparghanika ndi ukari winu; titenthemeskeka ndi kukwiya kwinu.

⁸ Mwaŵika vyakubende vidu paurongo pinu, viheni vidu vyakubisika vye pakweru pa maso ghinu.

⁹ Pakuti nyengo ya umoyo widu yidumulika ndi ukari winu, virimika vidu vimara nge nkhusiska mtima.

¹⁰ Virimika vya umoyo widu vye machumi ghankhonde ndi ghaŵi pe, pamwenga virimika machumi ghankhonde ndi ghatatu asani tarutiliyako; ndipuuli cho vititipingiya ifwe ndi suzgu ndi chitima; umoyo umara ruŵi, ndipo ifwe tiruta.

¹¹ Ndiyani yo waziŵa nthazi kandundu kinu? Ndiyaniyo waziŵa kofya uli ko kwe mu ukari winu?

¹² Tisambizgeni kuŵerenga mazuŵa ghidu alinga kuti tito mtima wa zeru.

¹³ Mpaka zuŵanji? Weni, Ambuya mwe! Chitiyani lisungu ŵateŵeti ŵinu.

¹⁴ Mlenji ndi mlenji mutigutiske chanju chinu chakufikapo, mwakuti tisekerenge ndi kukondwa mu mazuŵa ghidu ghose.

¹⁵ Mutipaske likondwa leneko le nge ndimo mungutipaskiya vitima, mu virimika vyose vyo tinguŵa mu masuzgu.

¹⁶ Zomerani kuti ifwe, ŵateŵeti ŵinu, tiwone nchitu zinu zanthazi; ndi unkhankhu wa mazaza ghinu ku mphapu yidu.

¹⁷ Ambuya Chiuta widu, vitumbiku vinu viŵe paku ifwe, ndipo mutisakatiske mwaku vyose vyo tichita! Inya, mwaku vyose mutisakatiske!