Sumu 9 - Tonga Bible 1986

Sumu yakuwonge urunji waku Chiuta

Ku wakumba mura: pa Muti-labene. Sumu yaku Davidi

¹ Ndiwongenge Chiuta ndi mtima wangu wose; ndikonkhomenge vyakuzuziswa vinu vyose.

² Ndikondwenge ndi kwangara mwaku imwe, ndikoŵeriyenge ku zina linu mwa ŵapachanya limu.

³ Pakuwere kuvuli ŵarwani ŵangu, ŵanguguŵa ndi kumara pa maso pinu.

⁴ Pakuti imwe mungukhozga urunji wa mlando wangu; munguja pa chitengo kupereka cheruzgu chakurunjika.

⁵ Mwachenya mitundu, mwaparghang'a ŵaheni; zina lawo mwasisita ku muyaya ndi muyaya.

⁶ Ŵarwani ŵamara tetete, ŵaŵa mapopa muyaya; misumba yawo mwazuwa; ndipo chikumbusku chawo chamariya limu.

⁷ Kweni Ambuya ŵepa chitengo muyaya, ajarika chitengo chawo kuti ŵeruzgenge;

⁸ ndipo ateruzga charu mu urunji, ateruzga ŵanthu mu kunyoroka.

⁹ Ambuya ndi linga ku ŵakukandirizgikiya pasi, ndi linga mu nyengo za suzgu.

¹⁰ Ndipo wo ŵaziŵa zina linu ŵaŵika chigomekezgu chawo mwaku imwe, Ambuya, kuti mwaŵajowo cha akumupenjani.

¹¹ Mbiyani marumbu ku Ambuya, akuja mu Zioni! Taulani mukati mu ŵanthu nchitu zawo!

¹² Pakuti iwo wati ŵakumbuka wakutayiya thayu ndopa; kuliya kwa ŵakusuzgika kuti waruwa cha.

¹³ Ndichitiyeni wezi, A Chiuta! A wonanimo ŵatindisuzgiya ŵakunditinkha, imwe mutindiyuskamo mu malikomo gha nyifwa,

¹⁴ mwakuti ndikonkhomenge marumbu ghinu ghose, ndi kuti mu malikomo gha mwana munthukazi wa Zioni, ndikondwenge mu utaski winu.

¹⁵ Mitundu yawa mu mbuna yo ŵangukumba; mu chirepacho ŵanguthya ndimo rundi lawo lawira.

¹⁶ Ambuya ajiziŵiska ŵeneko, achita cheruzgu; ŵaheni ŵawira mu nchitu za manja ghawo.

¹⁷ Ŵaheni ŵakarutanga ku muunda, yose mitundu yakuruwa Chiuta.

¹⁸ Chifukwa msauchi kuti wakaruwikanga nyengo yose cha, ndipo chigomezgu cha ŵakavu kuti chikamariyanga limu cha muyaya.

¹⁹ Sokani, Ambuya mwe! Kuti waruske cha munthu; mitundu yeruzgike pa maso pinu!

²⁰ Muŵatenthemeske, Ambuya! Mphanyi mitundu yaziŵa kuti iwo mbanthu!