Sumu 88 - Tonga Bible 1986

Rombu la kutaskika ku nyifwa

Sumu ya ŵana ŵaku Kora. Ku wakumba mura; pa Mahalati-Leanote. Sumu yaku Hemani mu Ezrahi

¹ Ambuya Chiuta, wa utaski wangu, msana ndi usiku ndabongore paurongo pinu.

² Vwani kuromba kwangu; tegherezgani kukudandaula kwangu:

³ chifukwa visuzgu vinandi vyandiwiya ndipo nde pafupi ndi nyifwa.

⁴ Ndapimikiya pamoza ndi wose ŵakuruta ku nyifwa; nthazi zangu zose zamara.

⁵ Ndatayika mukati mu ŵakufwa; ndaŵa nge mba kubayika ŵakura mu miunda yawo, ŵeniwo imwe mwaŵaruwiya limu, wo ŵe kubwalo kwa chovyo chinu.

⁶ Mwandipong'a pasi pa muunda, mu zenje litali la mdima.

⁷ Ukari winu utindizitiska, ndipo ndisuzgika kusi ku mayigha ghake.

⁸ Mwandipatuska ku ŵabali ŵangu; mwandisanduska cha mwikhu kwaku wo. Ndajarikiya mukati ndipo kuti ndingaziŵa kutuwa cha;

⁹ maso ghangu ghatakamiya chifukwa cha suzgu. Ambuya, zuŵa ndi zuŵa ndidana kwaku imwe, ndipo manja ghangu ndisoske kwinu mu kuromba!

¹⁰ Kumbi ŵakufwa mungaŵachitiya vyakuziziswa? Kumbi ŵakufwa ŵangayuka ndi kurumba imwe?

¹¹ Kumbi ku muunda wakonkhoma vyachanju chinu chakufikapo, pamwenga umagomekezgeka winu mu malo gha pharghaniko?

¹² Kumbi vyakuziziswa vinu viwoneka mu malo gha mdima gha; pamwenga vyamampha vinu mu charu cha chiruwa?

¹³ Ambuya, ine ndiliriya chovyo chinu; mlenji ndi mlenji ndiromba imwe.

¹⁴ Mutindipatiyanji, Ambuya mwe? Mubisamiyanji kwangu?

¹⁵ Ndaŵa wakusuzgika pafupi kufwa kutuwa ku uhurwa wangu; ndavunda ndi mphingu ya kulanga kwinu.

¹⁶ Ukari winu wakofya wandikuka; vyakofya vinu vyandiparghang'a.

¹⁷ Vitindizunguliya zuŵa lose nge nkhusefuka kwa maji; vyandizingirizga kose kose.

¹⁸ Mwapatuskiya kutali nanga mbabali ŵangu ŵapa mtima; wakusungana nane yo wajako ndi mdima pe.