Sumu 86 - Tonga Bible 1986

Sumu ya kuŵeya ndi kugomekezga

Rombu laku Davidi

¹ Tegherezgani kwangu, Ambuya, ndipo mundamuke, chifukwa nde wakusuzgika ndi msauchi.

² Ndipo zomoskeni ku nyifwa, chifukwa ndivwiya imwe; nditaskeni, pakuti nde mteŵeti winu, wakugomekezga mwaku imwe.

³ Ndimwe Chiuta wangu, Ambuya, ndichitiyeni wezi; kwaku imwe ndiromba zuŵa lose.

⁴ Ambuya, kondweskani mteŵeti winu, chifukwa ndiyinuskiya kwinu mzimu wangu.

⁵ Pakuti mwe amampha, Ambuya, ndi akugowoke; mwaŵakuzara chanju chakufikapo kwaku wose wo ŵadana kwaku imwe.

⁶ Ambuya, tegherezgani ku rombu langu; avwani mazu ghakuŵeyere kwangu.

⁷ Nditimudanani mu nyengo za suzgu, chifukwa mutamuka kuromba kwangu.

⁸ Kulivi Chiuta nge ndimwe Ambuya mu ŵachiuta nanga njumoza kulivi yo wangaziŵa kuchita vyo imwe muchita.

⁹ Mitundu yose yo imwe kukulenga yikazanga ndi kugwada paurongo pinu, Ambuya, ndipo ŵakankhuskenge zina linu.

¹⁰ Ndimwe pe wakuchita vya minthondwi, chifukwa ndimwe mwija, Chiuta wa mazaza.

¹¹ Ndisambizgeni, Ambuya, cho mutindikhumbiya kuchita, ndipo ndikavwiyanga imwe mu ukongorekwa; ndisambizgeni kumutataliyani mu kujipereka kwakufikapo.

¹² Ndirumbenge imwe ndi mtima wangu wose, Ambuya Chiuta wangu; ndimemezenge ukuru winu muyaya.

¹³ Pakuti chanju chinu nchikuru pakuine; mwanditaska kutuwa pasi pa muunda.

¹⁴ A Chiuta, ŵanthu ŵankhaza ŵatindiziya; mpingu wa ŵanthu ŵakari ŵakhumba kundibaya, ŵanthu wo kuti ŵaghanaghanako kanthu ndi imwe cha.

¹⁵ Kweni imwe, Ambuya, mwe Chiuta walisungu ndi wakwanja, wachizita ku ukari, nyengo yose waulemu ndi ukongorekwa.

¹⁶ Ng'anamukiyani kwangu ndipo ndichitiyeni wezi; ndinthaziskeni, ndi nditaskeni, chifukwa nditakatakiya imwe, nge ndimo anguchitiya ama.

¹⁷ Ndirongoni chisimikizgu cha umampha winu, Ambuya; mwakuti wose ŵakunditinkha ŵachiti soni, ŵachiwona kuti imwe mwandovya ndi kundisangaruska.