Sumu 85 - Tonga Bible 1986

Kurombe lisungu laku Chiuta pa khamu lake

Ku wakumba mura. Sumu ya ŵana ŵaku Kora

¹ Mungukankhaŵiya charu chinu, Ambuya mwe; munguwezga umkoli waku Yakobe.

² Mungureke kulakwa kwa khamu linu; mungugowoke kubende kwawo kose.

³ Mungureka ukari winu paku iwo, mungujiwezga ku ufyu wa kandundu kinu.

⁴ Tiwezgeni, A Chiuta mtaski widu, ndipo tayani kukara kwinu paku ifwe!

⁵ Kumbi mukatundiyanga paku ifwe muyaya? Kumbi ukari winu ukarutiliyanga ku migonezi yose?

⁶ Asi imwe muwerezgengepo kutisisipuska mwakuti khamu linu likondwere mwaku imwe?

⁷ Tirongoni chanju chinu chakufikapo, Ambuya, ndipo utaski winu tipaskeni.

⁸ Ndivwenge cho Chiuta Ambuya akakambanga, pakuti akambenge chimangu ku ŵanthu ŵawo, ku ŵatuŵa ŵawo, kwaku ŵeniwo ŵang'anamukiya kwaku iwo mu mitima yawo; asani tirekenge kuwere ku nthowa zidu ziheni.

⁹ Nadi utaski wawo wepafupi ku ŵakumopa, kuti unkhankhu wawo uje mu charu chidu.

¹⁰ Chanju chakufikapo ndi ukongorekwa vyaziya pamoza; urunji ndi chimangu vyakumana.

¹¹ Mvwiyu wa munthu ukabukanga kutuliya pa charu, ndipo urunji waku Chiuta ukalereskanga pasi kutuliya kuchanya.

¹² Inya, Ambuya akatisakatiskanga, ndipo charu chidu chipaskenge usambasi wa vuna.

¹³ Urunji udanjiyenge paurongo pa Ambuya, kunozge nthowa marwayo ghawo.