Sumu 83 - Tonga Bible 1986

Kuŵeyere Chiuta kutimbanizga ŵamawongo

Sumu yaku Asafi

¹ A Chiuta, rekani kuchetema; mungajanga chisisi, A Chiuta, mungaja chisisi!

² Alereskani, ŵarwani ŵinu ŵemu chivurupi, ndipo ŵo ŵatinkha imwe ŵagaruka.

³ Ŵapangana upu pa ŵanthu ŵinu muchibisibisi; ŵapangirana pa ŵanthu wo imwe mutiŵavikiriya.

⁴ Ŵatiti, “Zaninga, tiyeni tiparghang'e mtundu wawo, alinga kuti Yisraele wareke kukumbukika muyaya!”

⁵ Inya, ŵanozga chiŵembo ndi mtima umoza, ŵapangana phanganu kumikana namwe;

⁶ ŵanthu ŵaku Edomu ndi ŵaYishumaele, ŵaMoabu ndi ŵaHagiri;

⁷ ŵanthu ŵaku Geba, Amoni ndi Amaleke; ŵaku Filistia ndi ŵakuja mu Turo.

⁸ ŴaSiriya nawo ŵabatikana nawo, ndiwo janja la nthazi la mphapu yaku Loti.

⁹ Muŵachitiye cho munguchitiya ŵaku Midiani; nge nkhwaku Sisera ndi Yabini pa msinji wa Kishoni,

¹⁰ wo ŵanguthereskeka pa Endoro, ŵeniwo vitanda vyawo vinguŵa vundira pa charu.

¹¹ Ŵarongozgi ŵawo ŵankhondo muŵachitenge ndi Orebe ndi Zebe. Thereskani mafumu ghawo ghose nge ndi Zeba ndi Zalamuna,

¹² wo ŵanguti, “Tikatonga charu chaku Chiuta kuti chiŵe chihara chidu.”

¹³ Chiuta wangu, muŵambininiske nge ndi fuvu, nge ndi mwere wo mphepo yiputiska.

¹⁴ Mo moto utoche lisuwa, nge ndimo lufya litoche mapiri,

¹⁵ viyo ndimo muŵadikiskiye ndi chimphunga chinu, ndipo muŵawofye ndi lirondo linu!

¹⁶ Ambuya, visku vyawo muviburumutizge ndi soni, mwakuti ŵapenje zina linu.

¹⁷ Ŵalengeskeke ndipo ŵatenthemeskeke muyaya, ŵafwiye mu chilengesku chikuru.

¹⁸ Muŵaziŵiske kuti imwe pe mwija, mwaŵenimwe zina linu ndimwe Ambuya, mwe Wapachanya Limu pa charu chose chapasi.