Sumu 81 - Tonga Bible 1986

Ŵezi waku Chiuta, unonono wa khamu laku Yisraele

Ku wakumba mura; pa Gititi. Sumu yaku Asafi

¹ Kamburiyani Chiuta nthaziyidu; mbani marumbu ku Chiuta waku Yakobe!

² Samphuskani nkhoŵera, mbani zing'oma; mbani sumu zakunozga pa bangwe ndikaligu.

³ Mbani mbata pa nyengo ya dghera; pa zuŵa la mwezi ufya, ndi pa baraŵara.

⁴ Ili ndi dangu mu Yisraele, ndi langulu laku Chiuta waku Yakobe.

⁵ Wangumika langulu ili mwaku Yosefe, wachituwa mu charu cha Egipiti.

⁶ Ndituvwa mazu gha chilendo ghakuti: “Ndingutuzgapo katundu mzitu pa pheŵa lako; manja ghako ndingughakanizga ku kunyamuwa masokora.

⁷ Po wenga mu suzgu ungundidana, ndipo ndingukutaska. Kutuliya mu malo ghangu ghakubisika, mu mweza, ndingukwamuka; ndingukwesa pa maji ghaku Meriba.

⁸ “Avwani, mwa ŵanthu ŵangu, ku kuchenjezga kwangu; Yisraele, mphanyi ungutegherezga kwangu!

⁹ Mungateŵetiyanga chiuta wa chilendo cha, pamwenga kusopa so Chiuta wa kuchiri kunyake.

¹⁰ Ndine Ambuya, Chiuta winu, yo wangumutuzgani mu charu cha Egipiti. Yasamani mlomo, ndipo ndikamuliskaninga.

¹¹ “Kweni ŵanthu ŵangu kuti ŵangutegherezga kwangu cha; Yisraele kuti wangundivwiya cha.

¹² Viyo ndinguŵazomerezga kuruta mu unonono wa mtima wawo, ndi kuchita vyose vyo wangukhumba.

¹³ Owe ŵanthu ŵangu mphanyi ŵangundivwa, mphanyi Yisraele wangwenda mu nthowa zangu!

¹⁴ Ruŵi ndatinge ndithereskenge ŵarwani wawo ndi kupunda ŵakupindikana ŵawo.

¹⁵ Wose ŵakutinkha Ambuya mphanyi ŵangugwada paurongo pawo; kulangika kwawo kurutiliye mpaka muyaya.

¹⁶ Mphanyi ndingumurghiskani trigu wa kunozga, ndikumugutiskani ndi uchi wa mdondo.”