Sumu 79 - Tonga Bible 1986

Kuliriya kupasuka kwa Yerusalemu, ndi kurombe chovyo

Sumu yaku Asafi

¹ A Chiuta, ŵamitundu ŵazinga ŵanthu ŵinu mu charu! Ŵakazuzga nyumba yinu yakupaturika, ŵapasuwa Yerusalemu.

² Ŵapereka vitanda vya ŵanthu ŵinu kuŵa kurgha kwa viyuni, nyama ya ŵateŵeti ŵinu ku nyama, za mudondo.

³ Ŵakudiska ndopa za ŵanthu ŵinu nge ndi maji; ndopa zikudika nge ndi maji kuzunguliya Yerusalemu yose, ndipo pengavi nanga njumoza wakuŵaŵika.

⁴ Taŵa chitozeru ku ŵanasi ŵidu; kawerere ndi chipukung'a mutu ku ŵakutizingirizga.

⁵ Mpaka zuŵanji, Ambuya? Mpaka zuŵanji mukakwiyanga nafwe? Kumbi ukari winu ukarutiliyanga kocha nge ndi moto?

⁶ Kwiyani ndi mitundu yo yireka kumuziŵani imwe, ndi maufumu gho ghareka kudana pa zina linu!

⁷ Ŵabaya ŵanthu ŵidu, ndi kupasuwa charu chidu.

⁸ Rekani kusuzga ifwe pa uheni wa auskefwe, kweni tichitiyeni lisungu le, chifukwa tasiskikiya pasi ukongwa.

⁹ Tovyeni, A Chiuta, mtaski widu, chifukwa cha unkhankhu wa zina linu.

¹⁰ Yitifumbiyengenji mitundu, kuti, “Wepani Chiuta winu?” Mphanyi tawona kuti mwayisuzga mitundu, chifukwa cha kudika kwa ndopa za ŵateŵeti ŵinu!

¹¹ Tegherezgani ku mitamanthu ya ŵakumangika, ndipo ndi nthazi zinu zikuru ŵafwatuweni wo ŵakutemeke ku kubayika.

¹² Ambuya, awerezgiyenipo ŵamitundu kankhonde ndi kaŵi; chifukwa cha kutuka kose ko ŵatuka imwe.

¹³ Ndipo ifwe, khamu linu, ndi mberere za uliska winu, tiwongenge imwe muyaya; ndikutaula marumbu ghinu ku migonezi yose.