Sumu 78 - Tonga Bible 1986

Chiuta warongozga ŵanthu ŵake chingana mbambura ukongorekwa

Sumu yaku Asafi 1 Tegherezgani, mwa ŵanthu ŵangu, ku kusambizga kwangu;

¹ Tegherezgani, mwa ŵanthu ŵangu, ku kusambizga kwangu; sendekiyani makutu ghinu ku mazu gha mlomo wangu.

² Ndijurenge mlomo wangu mu ntharika; ndikambenge vyakubisika vya mwaka.

³ Vinthu vyotavwa ndi kuviziŵa, vyo auskefwe ŵakutinene.

⁴ Kuti, tivibisenge ku ŵana ŵidu cha, kukonkhome mgonezi wo utuza; vya milimu ya nthazi ya Ambuya ndi mazaza ghawo, ndi vinthu vyakuziziswa vyo achita.

⁵ Angupereka malangulu ku ŵanthu ŵaku Yisraele, ndi marangu ku mphapu yaku Yakobe. Angupereka virunguchizgu ku auskefwe kusambizga malangulu ghawo ku ŵana ŵawo,

⁶ alinga kuti mgonezi wo utuza uvisambirenge, ndi kuti pavuli pake ŵakambiyenge ŵana ŵawo.

⁷ Mu chifukwa ichi iwo nawo ŵakaŵikanga chigomekezgu chawo mwaku Chiuta, nyengo zose kuvwiya marangu ghake.

⁸ Ŵareke kuŵa nge mba uskeu, ŵanthu ŵakupuruka ndi ŵakutwanga, mgonezi wo chigomekezgu chawo kuti chingukho mwaku Chiuta cha, wo kuti ŵangujaririya ŵachivwanu mwaku iyo cha.

⁹ Ŵina Efraimu, wo ŵangurwa ndi mauta, ŵanguthaŵa mu zuŵa la khondo.

¹⁰ Kuti ŵangusunga phanganu lawo ndi Chiuta cha; ŵangukana kuvwiya langulu lake.

¹¹ Ŵanguruwa nchitu zake, vwakuziziswavyo wanguŵarongo.

¹² Pa maso pa auskeu wanguchita vyakuziziswa, mu charu cha Egipiti, mu malisuwa gha Zoani.

¹³ Wangupatuwa nyanja wanguŵambuska, wanguchitiska maji kuti ghame nge nchiliŵa.

¹⁴ Ndi msana wanguŵarongozga ndi bingu, ndipo usiku wose ndi kungweruka kwa moto.

¹⁵ Wanguswa majarawi mu bozwa, ndi kuŵamweska maji nge ndi mu ndimba.

¹⁶ Wangutuzga msinji mu jarawi, ndipo wangudiska maji nge ndi msinji.

¹⁷ Kweni ndipuuli ŵangurutiliya kunangiya Chiuta, ndipo Wapachanya Limu ŵangumugarukiya mu bozwa.

¹⁸ Mwa dala ŵangumwesa Chiuta, pa kupempha kurgha ko ŵangukhumba.

¹⁹ Ŵangumikana ndi Chiuta, ŵakuti, “Kumbi Chiuta wanguziŵa kunozga gome mu bozwa?

²⁰ Mbuneneska kuti wangupuma jarawi, ndipo maji ghangudika kwakusapatiya; kweni kumbi wangaziŵa kutipaska chiŵande, pamwenga kuŵapaska nyama ŵanthu ŵake?”

²¹ Viyo Ambuya anguvwa, angukaripa; ndipo ukari wawo paku iwo ungukuwa; angupweteka ŵanthu ŵawo ndi moto,

²² chifukwa ŵanguwulavi chigomekezgu mwaku Chiuta, ndi kuti ŵanguthamiya utaski wake cha.

²³ Sono wangulanguliya mitambo kuchanya ndipo makhomo ghangujurika;

²⁴ wangung'iska mana paku iwo kuŵa kurgha, ndi kuŵapaska mbutu ya kuchanya.

²⁵ Munthu wangurgha chiŵande cha ŵangelo; Chiuta wanguŵapaska kurgha kunandi.

²⁶ Wangutuma mphepo ya kuvuma kuti yipute kuchanya, ndipo ndi nthazi yake wanguvunduwa mphepo yake malaŵi;

²⁷ wangung'iska tuyuni nge ndi fuvu unandi wake, tunandi nge ndi mchenga wapa likumba;

²⁸ wangutuwiskiya mukati mu ugoŵi, kwakuzunguliya mahema ghawo.

²⁹ Viyo ŵanthu ŵangurgha ndi ŵanguguta; Chiuta wanguŵapaska vyose vyo ŵangukhumba.

³⁰ Kweni po ŵenga ŵeche kurgha, ŵenga ŵandagute,

³¹ Chiuta wangukwiya paku iwo, ndipo wangubayapo ŵanthu ŵanthazi, ŵanyamata ŵakuzirwa ŵa ŵaYisraele!

³² Mwaku vyose vya minthondwi yake ŵanthu ŵangurutiliya mu kulakwa mbwenu, ndi kuti ŵangugomekezga cha.

³³ Viyo wangumara mazuŵa ghawo nge ndi mvuchi, maumoyo ghawo mu soka lakuchita kubuchizga.

³⁴ Penipo wangukosopo ŵanyake, ŵakujapo wo ŵangumupenja; ŵangung'anamuka, ŵangupenja, Chiuta ndi mwamphu wose.

³⁵ Ŵangukumbuka kuti Chiuta ndi jarawi lawo, kuti Chiuta wapachanya limu ndi muwombozi wawo.

³⁶ Kweni mazu ghawo ghose wenga utesi wa waka; vyose vyo ŵangurongoro wenga utesi.

³⁷ Mtima wawo kuti unguŵa wakunyoroka cha; kuti ŵanguŵa ŵakongorekwa mu phanganu lake cha.

³⁸ Kweni Chiuta wenga wa lisungu pa ŵanthu ŵake, wangugowoke kubende kwawo, ndipo kuti wanguŵaparghang'a cha. Nyengo zinandi wangujiko ku kandundu ndi kujikanizga ku ukari wake.

³⁹ Wangukumbuka kuti iwo ŵenga ŵanthu ŵaka, ŵayana ndi mphepo yo yiputa, yijumpha kuti yiwe so cha.

⁴⁰ Nkhanandi ukongwa ko ŵangumugarukiya mu bozwa; nyengo zinandi ŵangumuchitiska chitima!

⁴¹ Kaŵikaŵi ŵangumwesa Chiuta, ndi kumukwiyiska Mtuŵa Yumoza, waku Yisraele.

⁴² Ŵanguruwa nthazi zake zikuru, ŵanguruwa nyengo yo wanguŵataskiya ku ŵarwani ŵawo,

⁴³ po wangurongo nchitu zake zikuru ndi minthondwi mu lisuwa la Zoana, mu charu chaEgipiti.

⁴⁴ Wangusanduska misinji kuŵa ndopa, mwakuti ŵaEgipiti ŵareke kumwa mu tumisinji twawo.

⁴⁵ Wangutuma milembwe ya nyezi mukati mwawo, zo zinguŵargha, ndi ŵamuchuwa, wo ŵanguŵananga.

⁴⁶ Wangutuma kapuchi kurgha vyakurgha vyawo, ndi ŵaphanana kuparghang'a minda yawo.

⁴⁷ Wangubaya ndi matalala mphereska zawo, nkhuyu zawo ndi chiuli.

⁴⁸ Wangubaya ng'ombe zawo ndi matalala, miskambu yawo ndi malimphezi.

⁴⁹ Wanguŵapasuwa mu ufyu wa kandundu kake, ukari, kuŵaŵa kwa mtima, ndi suzgu; pakutuma mpingu wa ŵangelo ŵakuparghang'a.

⁵⁰ Kuti wangukanizga ukari wake cha; pamwenga kusunga maumoyo ghawo, kweni wangupereka maumoyo ghawo ku chederu.

⁵¹ Wangubaya ŵana ŵaumwali mu Egipiti, ŵakudanga ŵa nthazi zawo mu mahema ghaku Hamu.

⁵² Sono wangurongozga khamu lake nge ndi mliska; wangurongozga mu bozwa.

⁵³ Wanguŵarongozga umampha, ndipo kuti wangopa cha; kweni nyanja yingubisa ŵarwani ŵawo.

⁵⁴ Wanguŵatore ku charu chake chakupaturika, ku mapiri gho iyo mweneko wanguthereska.

⁵⁵ Wangudikiska mitundu paurongo pawo, wanguŵagaŵiya chihara chawo ndi mweso, ndi kujarika mafuku ghaku Yisraele mu mahema ghawo.

⁵⁶ Kweni ndipuuli ŵangumwesa ndi kumugarukiya, Chiuta Wapachanya Limu, ndipo visimisimi vyake kuti ŵanguvisunga cha;

⁵⁷ ŵanguwere vuli ndi kuchita chigaruka nge mbauskeu; ŵambura magomezgeka nge ndi mivwi yakupong'eka mu uta, wakunyongoroka.

⁵⁸ Wangumukalariska ndi malo ghawo ghaheni gha visopo, ŵangumuchitiska sanji ndi ŵangoza ŵawo.

⁵⁹ Chiuta pakuchiwona ichi wangukalipa, viyo wanguŵapatiya limu ŵanthu ŵake;

⁶⁰ wangutuwamo mu hema lake ku Shilo, muzi wo wangujamo mukati mu ŵanthu.

⁶¹ Wanguzomerezga ŵarwani kukwamphuwa bokosi la phanganu, kweniko nthazi ndi unkhankhu wake vyawonekanga.

⁶² Wangukalipa ndi ŵanthu ŵapa mtima wake, ndipo wanguŵapereka kuti ŵabayike ndi ŵarwani ŵawo.

⁶³ Ŵanyamata ŵangubayika mu nkhondo, ndipo ŵamwali pengavi yumoza wakuŵato nthengwa.

⁶⁴ Ŵazukuru ŵangubayika ndi malipanga, ndipo vyoko vyawo kuti vinguŵatenje cha.

⁶⁵ Kweni pavuli Ambuya anguyuka nge ngwakutuwa mu tulo; anguchita nge ndi munthu wanthazi yo waloŵe vinyo.

⁶⁶ Angudikiskiya ŵarwani ŵawo kuvuli, kuŵathereska kwa soni ndi kuŵamariya limu.

⁶⁷ Angupata mphapu yaku Yosefe; kuti angusankha fuku laku Efraimu cha.

⁶⁸ Mu malo ghake angusankha fuku laku Yuda, ndi phiri Zioni, lo angwanja ukongwa.

⁶⁹ Penipa anguzengapo nyumba yawo yakupaturika, nge ndi muzi wawo kuchanya; anguwukhozga nge ncharu chapasi, kuwuvikiriya nyengo yose.

⁷⁰ Angusankha mteŵeti wawo Davidi; angumuto ko wasunganga mberere,

⁷¹ angumuto ko waliskanga mberere za ŵana. Angumchita kuŵa karonga paku Yisraele, mliska wa ŵanthu ŵaku Chiuta.

⁷² Ndipo nadi wanguŵa mliska wawo mu ukongorekwa wa mtima wake, wanguŵarongozga ndi janja la vinjeru.