Sumu 77 - Tonga Bible 1986

Chisangarusku musuzgu pa kukumbuka vyakulimba vyaku Chiuta

Ku wakumba mura; pa Yedutuni. Sumu yaku Asafi

¹ Ndiliriya kwaku Chiuta; ndiliya, ndipo watindivya.

² Mu nyengo ya suzgu ndiromba Ambuya; usiku wose ndisoska manja ghangu mu kuromba, kweni kuti ndisaniya chisangarusku cha.

³ Ndighanaghana ndi Chiuta, ndipo nditamantha; ndirunguruka, ndipo mzimu wangu ugongowa.

⁴ Kuti watindigoneka tulo cha; ndisuzgika ukongwa reka nditondeka kukamba.

⁵ Ndighanaghana ndi mazuŵa gha mwaka, ndi kukumbuka virimika vya migonezi ya kali.

⁶ Usiku utindirutiya mukati mu maghanaghano ghakuru; ndirunguruka, ndipo cho nditijifumba mu mtima ndi ichi:

⁷ “Kumbi Ambuya akandijowonga nyengo yose? Kumbi kuti akandichitiyanga so lisungu cha muyaya?

⁸ Kumbi chifundu chawo chamariya limu paku ine; kumbi mapanganu ghawo nagho asi ghamariya limu?

⁹ Kumbi Chiuta waruwa kuŵa wa chisungusungu? Kumbi ukari ndiwo wato malo gha chitima chake?”

¹⁰ Pavuli ndinguti, “Cho chitindipweteka weniukongwa nchakuti Chiuta kuti ngwanthazi so cha.”

¹¹ Ndikumbukenge nchitu zinu zikuru Ambuya; ndikajikumbuskanga ndi vyakuziziswa vyo munguchita mu mazuŵa gharuta.

¹² Ndighanaghanenge ndi vyose vyo mukuchita; ndirungurukenge pa milimu yinu yose.

¹³ Chose cho muchita, A Chiuta, nchakupaturika! Ndi chiuta nuyu mukuru yo wayana ndi Chiuta widu?

¹⁴ Ndimwe Chiuta wakuchita vya minthondwi; yo wakurongo mazaza ghake mukati mu mafuku gha ŵanthu.

¹⁵ Ndi janja linu munguwombo ŵanthu ŵinu, mphapo yaku Yakobe ndi Yosefe.

¹⁶ Po maji ghangumuwonani, A Chiuta, ghanguchita mantha, zindimba za nyanja zingumbwambwanthiya.

¹⁷ Mabingu ghangung'iska vuwa; mitambo yingudiririska, ndipo malimphezi ghangumwetuka mu malo ghose.

¹⁸ Mazu gha chidiririzi chinu ghenga mu kavuruvuru; ndipo kumwetuka kwamalimphezi kungungweruska charu chose; charu chingutenthema ndi chinguyaghayika.

¹⁹ Mungwenda mu zinyanja mungwambuka nyanja zikuru, kweni mo mungukanda kuti munguwoneka rwayo cha.

²⁰ Mungurongozga ŵanthu ŵinu nge ndi muskambu, ndipo Mosese ndi Aroni ndiwo ŵenga ŵakuŵatufuliya.