Sumu 74 - Tonga Bible 1986

Kuliriya charu chakunangika ndi wamawongo

Sumu yaku Asafi

¹ A Chiuta, mwatijowoliyanji viyo muyaya? Kasunkhiyanji kandundu kinu pa mberere za uliska winu?

² Kumbukani mpingu winu, wo mukugula mwaka, ŵanthu wo mukuwombo kuŵa khamu laku mwaŵeni. Kumbukani phiri la Zioni, mo mwajanga!

³ Marundi ghinu ghende pa vyakupasuka ivi; ŵarwani ŵapasuwa vyose mu malo ghakupaturika.

⁴ Ŵakupindikana ŵinu ŵakoroma mukati, mu malo ghinu ghatuŵa; ŵamika visimikizgu vyawo pa visimikizgu.

⁵ Pa khomo la pachanya ŵakudumuwa miti yakupinjika ndi mbavi zawo.

⁶ Ndipo miti yake yose yakusemeka ŵakubwanganduliya pasi ndi twa mphompho ndi zinyundu.

⁷ Nyumba yinu yakupaturika akocha ndi moto, ŵakukazuzga malo ghakujamo zina linu ndi pasi viyo.

⁸ Mu mitima yawo ŵatinge, “Tiyeni tiŵaparghan'iye limu.” Ŵakocha malo ghose ghakupaturika mu charu.

⁹ Visimikizgu vidu vyose vikuruta, nanga ndi mchimi nayo mulivi, ndipo palivi nanga njumoza mukati mwidu yo waziŵa kuti ichi chikafikanga mpaka zuŵanji.

¹⁰ Mpaka zuŵanji, A Chiuta, ŵarwani ŵidu ŵakatiweranga? Kumbi ŵakatukanga zina linu muyaya?

¹¹ Chifukwa nchine mwakana kutovya? Chifukwa nchine mumangiya manja ghinu ku msana?

¹² Kweni ndipuuli Chiuta, mwaŵa karonga widu kutuliya ku chiyambo; kuchita utaski mu charu.

¹³ Ndi nthazi yinu yikuru mungugaŵa nyanja, munguphwanya mitu ya vinyama vya mu nyanja.

¹⁴ Mungudumuwa mitu yaku mung'ona, mungumupereka nge nchakurgha cha ŵanthu ŵamu bozwa.

¹⁵ Imwe mungupaska maji kudika mu visima ndi msinji, mungukamuska misinji yakutandara.

¹⁶ Ngwinu msana, usiku nawo ngwinu; mukumika dazi ndi mwezi mu malo ghawo.

¹⁷ Imwe mukuŵika mphaka za charu; mukulenga chihanya ndi chifuku.

¹⁸ Kweni kumbukani ichi. Ambuya mwe, kuti ŵarwani ŵanu ŵawera imwe, ndipo ŵanthu ŵaphuzu ŵatuka zina linu.

¹⁹ Rekani kutaya ŵanthu ŵanu ŵambura wakovya ku ŵakupindikana ŵawo ŵakari; rekani kuruwa ŵanthu ŵinu ŵakumangika.

²⁰ Kumbukani phanganu lo mukupangana nafwe, pakuti chiwawa chazaza malo ghose gha mdima mu charu!

²¹ Ŵakusuzgika rekani kuzomera kuti ŵatondeke, kweni kuti ŵakavu ndi ŵasauchi ŵatumbike zina linu.

²² Sokani, A Chiuta, jikambiyeni mlando winu; kumbukani mo ŵamkana Chiuta ŵatimusekiyani zuŵa lose!

²³ Mungaruwanga kubangula kwa ukari kwa ŵarwani ŵinu, chiwawa chambura kurekezga cho chichitika ndi ŵakupindikana namwe.