Sumu 71 - Tonga Bible 1986

Khongwe lirombe utaski

¹ Mwaku imwe, Ambuya, A ndidingang'a; ndireke kukhozgeka soni!

² Chifukwa cha urunji winu, ndovyeni ndipo nditaskeni. Tegherezgani kwangu, ndi ndipozomoskeni!

³ Mundiŵiye chitanthali chakundivikiriya, linga lakukho, kunditaska, ndimwe chakudingang'amo ndi chipozomosko changu.

⁴ Mwa Chiuta wangu, ndipozomoskeni ku ŵanthu ŵaheni, ku nthazi ndi ukari wa ŵanthu ŵatimbanizi.

⁵ Ambuya, chigomezgu changu ndiŵika mwinu; ndathamiya mwaku imwe kutuliya ku wana-mana wangu.

⁶ Ndayegeme paku imwe mu umoyo wangu wose; ndimwe mwandivikiriya kutuwa ku kawi kangu; ndirumbenge imwe nyengo yose!

⁷ Umoyo wangu waŵa wakuziziswa ku ŵanandi, kweni imwe mwaŵa chivekeru changu chanthazi.

⁸ Mlomo wangu wazazika ndi rumbu linu, ndikankhuskenge imwe zuŵa lose.

⁹ Rekani kunditaya pa nyengo yino pakuti ndi khongwe; rekani kundisiya po nthazi zangu zamara.

¹⁰ Pakuti ŵarwani ŵangu ŵakamba gha paku ine; ŵakukhazga umoyo wangu ŵapangana pamoza,

¹¹ ŵatiti, “Chiuta wamujowo; mundondoloskeni ndipo mukoni, chifukwa palivi wakumutaska.”

¹² A Chiuta, rekani kuja patali ndi ine; mwa Chiuta wangu, tinthimikani kuzachindovya!

¹³ Ŵathereskeke ndi ŵamare, ŵakulimbana nane! Ŵalengesekeke, ŵachiti soni wo ŵapenja kundipweteka!

¹⁴ Ine nyengo yose ndigomekezgenge mwaku imwe; ndikarumbanga imwe rutaruta.

¹⁵ Ndikambenge vya urunji winu, zuŵa lose nditaulenge vya chipozomoske chinu; inya, nanga vizitu kwakuruska kuwamo kwangu.

¹⁶ Nditamikenge nthazi yinu, Ambuya Chiuta; nditaulenge urungi winu, urunji winu pe mbwenu.

¹⁷ A Chiuta, mwandisambizga kutuwa ku wana-mana wangu, ndipo mpaka sono ndeche kutaula nchitu zinu zakuziziswa.

¹⁸ Sono po nde khongwe, nyivu zeku mutu, rekani kundijowo, A Chiuta. Muŵenge nane po ndimemeza nthazi zinu ndimazaza ghinu, mpaka ku migonezi yo yituza.

¹⁹ Urunji winu, Chiuta ufika ku mitambo. Vyo mwachita, mwachita vikuru ukongwa; kulivi nanga njumoza wakuyana namwe!

²⁰ Imwe mwanditumiya suzgu ndi vyakupweteka, kweni mukandisisipuskanga so; kutuwa ku ndimba za charu chapasi; imwe mukandisoskiyanga so pachanya.

²¹ Mukandikuzganga kuruska pakudanga, ndipo mukandisangaruskanga so.

²² Ine nane ndikarumbanga imwe ndi bangwi, ndithokozenge kugomezgeka kwinu, mwa Chiuta wangu; ndimbiyenge marumbu kwaku imwe ndi kaligu, A Chiuta Mtuŵa Yumoza waku Yisraele.

²³ Milomo yangu yikamburenge ndi chimwemwe, po nditumumbiyani marumbu; ndikuŵerenge ndi unthu wangu wose, chifukwa imwe mwandiwombo.

²⁴ Ndikambenge vyaurunji winu zuŵa lose swi, pakuti wo wapenjanga kundipweteka ŵatondeka ndipo ŵachita soni.