Sumu 7 - Tonga Bible 1986

Wakumba waŵeyere Chiuta kumutaska ku ŵaheni

Sumu yaku Davidi, yo wangumbiya kwaku Chiuta pa mazu ghaku Kushi mu Benjamini

¹ Ambuya Chiuta wangu, mwaku imwe ndidingang'a; nditaskeni kwaku wose ŵakundindondoroska, ndipo ndipozomoskeni,

² vinu ŵangandiparuwa nge ndi nkharamu, kundiparuwa, kwambura wakundipozomoska.

³ Ambuya Chiuta wangu, asani ndachita ichi, asani mwe kubende mu manja ghangu,

⁴ asani ndamuwezge uheni mwanasi wangu, pamwenga kuphanga vya murwani wangu kwambura kafukwa,

⁵ iko murwanni wangu wandindondoroske ndi wandisaniye, wawuphwatiye pasi umoyo wangu, ndi kugoneka mzimu wangu mu fuvu.

⁶ Sokani, Ambuya, mu ukari winu, mujiyinuskiye pakumikana ndi ukari wa ŵakupindikana nane, yukani, A Chiuta wangu, imwe mwamika cheruzgu.

⁷ Unganu wa mitundu ya ŵanthu ukuzunguliyeni; ndipo pachanya paku wo muŵe pa chitengo chinu cha pachanya.

⁸ Ambuya ateruzga ŵanthu; nderuzgeni, Ambuya, kwakuyana ndi urunji wangu, ndi kwakuyana ndi ukongorekwa wo we mwaku ine.

⁹ Zomerani kuti uheni wa ŵaheni umare. Kweni imwe zengani ŵakurunjika, imwe mutesa mzimu ndi mitima, ndimwe Chiuta wakurunjika.

¹⁰ Nguru yangu yendi Chiuta, yo wataska wakutowa mu mtima.

¹¹ Chiuta ndi mweruzgi murunji, ndi Chiuta yo zuŵa ndi zuŵa watinkha uheni.

¹² Asani munthu wareka kung'anamuka, Chiuta wakanoranga lipanga lake; wapinda uta wake ndi kuwutweŵa.

¹³ Wajirongosole vidya vyakofya, mivwi yake wachita yakocha.

¹⁴ Ehe, munthu muheni wendi nthumbu ya viheni, wazuwuka suzgu, ndi kubara mautesi.

¹⁵ Wakumba mbuna, ndi kuyifura ndipo watuwa muzenje lo wafura.

¹⁶ Uheni wake uwere pa mutu waku iyo mweneko, ndipo nkhaza zake zisikiya pa liwombo la mweneko.

¹⁷ Ndiperekenge viwongo kwaku Chiuta kwakuyana ndi urunji wake, ndipo ndikoŵeriyenge ku zina la Ambuya apachanya ukongwa.