Sumu 68 - Tonga Bible 1986

Ambuya ndi Chiuta waku Sinai, ndi wa malo ghakupaturika

Ku wakumba mura. Sumu yaku Davidi

¹ Wasoke Chiuta, ŵambininike ŵamawongo ŵake; ndipo ŵakutinkha iyo ŵathaŵe paurongo pake!

² Mo usi uputiya ndi mphepo, ndimo muŵambininiskiye; mo phura lisungonoke paurongo pa moto, viyo ndimo ŵasoŵe ŵaheni pa maso ghaku Chiuta.

³ Kweni ŵarunji ŵakasekerenga ndi chimwemwe paurongo pake; ŵakakondwanga kwakufikapo.

⁴ Mbiyani Chiuta, mbiyani unkhankhu ku zina lake; murongosoliyeni nthowa, iyo wakukwera pa mitambo. Zina lake ndi Ambuya kondwani paurongo pawo.

⁵ Uskeu wa ŵaranda, muvikiriyi wa vyoko, ndi Chiuta wakuja munyumba yake yakupaturika.

⁶ Wapaska ku ŵakusauka muzi wakujamo; ndi kurongozge ŵakumangika kubwalo mu likondwa la wanangwa; kweni ŵachigaruka ŵakajanga mu charu cha chiparamba.

⁷ A Chiuta, po mungurongozge ŵanthu ŵinu, po mwachapukiyanga kuporota mu bozwa,

⁸ charu chapasi chinguyaghayika, ndipo mtambo ungung'iska vuwa, chifukwa chakuza kwaku Chiuta waku Sinai, kuza kwaku Chiuta waku Yisraele.

⁹ Mungung'iska vuwa yinandi, ndi kuwerezgamo charu chinu cho chinguvuka;

¹⁰ ŵanthu ŵinu ŵanguzenga muzi wawo muwa; mu umampha winu mungusakatiska ŵasauchi.

¹¹ Ambuya angulangula ndipo ŵanthukazi ŵanandi ŵangupinga makani:

¹² ghakuti, “Ŵakaronga ndi nkhondo, zawo ŵathaŵa, ŵathaŵa!” Ŵanthukazi mu muzi ŵangugaŵana muskowo;

¹³ ŵanguwoneka ulaka ndi nkhunda; ŵakubenekereka ndi siliva, wo mapapiku ghawo ghagadima ndi golide lakwengeka. Chifukwa nchine ŵanyake ŵaku imwe ŵajanga mu malikutu gha mberere?

¹⁴ Chiuta Wanthazi zose wachimbininiska ŵakaronga, kwenikuwa, nyankhuŵinda wanguwa pa Zalmoni.

¹⁵ Naghu ndi mazaza gha phiri la Bashani, phiri la zinchongwa-nchongwa!

¹⁶ Chifukwa chine iwe, mu mazaza gha zinchongwa-nchongwa, ulereska ndi sanji pa phiri lo Chiuta wasankha kujapo? Ambuya akajanga penipa muyaya!

¹⁷ Ndi magareta ghanthazi, vikwi machumi ghaŵi (20,000), vikwi pavikwi, Ambuya anguza kutuwa ku Sinai kwazifika mu malo ghakupaturika.

¹⁸ Mungukwere ku machanya, munguto ŵamikoli ŵanandi pamoza namwe; murombe vya wanangwa kutuwa ku ŵanthu ŵakugaruka. Ambuya Chiuta wakajanga kwenikuwa.

¹⁹ Tumbikani Ambuya, wo apinga mphingu zidu zuŵa ndi zuŵa; ndi Chiuta yo watititaska.

²⁰ Chiuta widu ndi Chiuta wa utaski; ndi Ambuya, Mbuyafwe, yo watitipozomoska ku nyifwa.

²¹ Kwakuneneska Chiuta waphwanyenge mitu ya ŵamawongo ŵake, mitu yaku ŵeniwo ŵanonope mu nthowa zawo ziheni.

²² Ambuya anguti, “Ndiwezgenge ŵarwani ŵako kutuwa ku Bashani; ndiŵawezgenge kutuwa ku zindimba zanyanja,

²³ mwakuti mubizge marundi ghinu mu ndopa zawo, ndikuti ŵagaru ŵinu nawo ŵaŵe ndi chigaŵa mu ŵarwani.”

²⁴ A Chiuta, michapu yinu ya upundi yikuwoneka kwaku wose, mendedu ghaku Chiuta karonga wangu, wachiya mu malo ghakupaturika:

²⁵ ŵakumba zisumu ŵenga panthazi, ŵakumba vya malisinga ŵenga pavuli, pakati penga ŵamwali ŵakumba tung'oma:

²⁶ “Tumbikani Chiuta mu ungano wa ŵanthu ŵake; tumbikani Ambuya, mose mwa ŵamphapu yaku Yisraele!”

²⁷ Pakudanga watuza Benjamini, fuku limana ukongwa, pavuli pake ŵarongozgi ŵaku Yuda ndi mpingu wawo, ŵakuwarondo mbarongozgi ŵaku Zebuluni ndi Naftali.

²⁸ Rongoni nthazi yinu, A Chiuta, rongoni nthazi yinu, A Chiuta, yo mwatichitiya.

²⁹ Kutuliya ku nyumba yinu yakupaturika mu Yerusalemu, kweniko ŵakaronga ŵatimupingiyani vyawanangwa.

³⁰ Chenyani Egipiti, nyama ya mudondo mu matete; chenyani mitundu, miskambu ya zinkhuzi ndi matholi ghawo, mpaka penipo wose ŵangwada pasi ndikukuthuliyani siliva wawo. Mbininiskani ŵanthu wo ŵatanja kuchita nkhondo!

³¹ Ŵamirizi ŵakazanga kutuwa ku Egipiti; ŵaEtiopia ŵakasoskanga manja ghawo mu kuromba kwaku Chiuta.

³² Koŵeriyani Chiuta, mwa mafumu gha charu chapasi, mbiyani marumbu ku Ambuya.

³³ Kwaku iwo ŵakugara pa mitambo, pa mitambo ya mwaka! Tegherezgani kwaku iwo, kamburani ndi kubangura kwa nthazi!

³⁴ Wandiskani nthazi yaku Chiuta; unkhankhu wake we pachanya paku Yisraele, mazaza ghake ghemu machanya.

³⁵ Nkhofya uli kwaku Chiuta mu malo ghake ghakupaturika, Chiuta waku Yisraele! Wapaska nthazi ndi mazaza ku khamu lake. Tumbikani Chiuta!