Sumu 65 - Tonga Bible 1986

Ulemu waku Chiuta ku charu ndi ŵanthu

Ku wakumba mura. Sumu yaku Davidi

¹ A Chiuta, ŵanthu ŵatenere kurumba imwe mu Zioni; ndi kupereka kwaku imwe cho ŵakupangana,

² chifukwa mutamuka marombo. Ŵanthu wose ŵakazanga kwaku imwe

³ pa chifukwa cha mauheni ghawo, vyakulakwa vidu vyatipunda kweni imwe mugowoke.

⁴ Ŵakukondwa mbeniwo imwe musankha, wo mutiŵajarika mumalo ghinu ghakupaturika! Tikakhorwanga ndi vyamampha vya mu nyumba yinu, vitumbiku vya mu nyumba yinu yakupaturika!

⁵ Mutitamuka, Chiuta Mtaski widu, ndipo mutititaska pakuchita vinthu vyakuziziswa. Ŵanthu mu charu chose chapasi, ndi ŵakusirgha la zinyanja, ŵagomekezga mwaku imwe.

⁶ Ndi nthazi yinu mwamika mapiri, kurongo nthazi zinu zakuzungura.

⁷ Muchetamiska kuwuruma kwa zinyanja ndi kuwuruma kwa mayigha; muchetamiska chiwawa cha mitundu.

⁸ Charu chose chichita mantha, chifukwa cha vinthu vikuru vyo mwachita. Machitidu ghinu ghapereka likondwa likuru kutuwa ku chigoti chimoza cha charu chapasi mpaka ku chigoti chinyake.

⁹ Muchezga ndi charu chapasi pakuchipaska vuwa, mwachisambisiska ukongwa ndi nyata, msinji waku Chiuta ngwakuzaza ndi maji; murongoso mbutu yawo, nadi mutiyirongoso.

¹⁰ Mutuma vuwa yinandi pa minda yakulimika ndipo mutiyizumbwiska ndi maji; mutoloŵeska nyata ndi manthonera alinga kuti chipozwa chikuwenge.

¹¹ Umampha winu upereka usambasi ukuru wa vuna; kweniko kose muruta kwe vya uzari!

¹² Mauliska ngakuzara ndi miskambu; mitunthu yazaza chimwemwe.

¹³ Malisuwa ghavwarikika ndi miskambu; madambo ghafukika ndi trigu, vikambura ndi kumba mu chimwemwe!