Sumu 64 - Tonga Bible 1986

Kurombe kutaskika ku ŵamawongo waku ubende

Ku wakumba mura. Sumu yaku Davidi

¹ Avwani mazu ghangu, A Chiuta, mu kudagha kwangu; nde wamantha nditaskeni ku ŵarwani ŵangu;

² ndibiseni ku upu wakubisika wa ŵaheni, kuchiwawa cha ŵakuchita utimbanizi,

³ wo ŵanora malilime ghawo nge ndi malipanga, wo ŵatweŵa mazu gha kuŵaŵa nge ndi mivwi,

⁴ mwakukhazga ŵapong'a pa ŵambura kalema, kwa mabuchibuchi ŵapong'a paku iyo kwambura mantha.

⁵ Ŵatijikhomeska mu fundu yawo yiheni; ŵakambirana vya kuthya viŵana mwakubisika, ŵaghanaghana kuti, “Njani wakatiwonanga?”

⁶ Ŵatata nthowa ziheni, ndipo ŵatiti, “Tanozga chiŵembu chakufikapo.” Mtima ndi maghanaghano gha munthu vyakuziziswa!

⁷ Kweni Chiuta wapong'enge muvwi wake paku iwo; ŵakarasikanga kwa mabuchibuchi.

⁸ Chifukwa cha lilime lawo waŵapasuwenge; wose ŵakuŵalereska ŵakapukung'anga mitu yawo.

⁹ Sono ŵanthu wose ŵakawopanga; ŵakonkhomenge vyo Chiuta watata, ndikughanaghanapo paku vyo wachita.

¹⁰ Ŵakurunjika ŵakondwerenge mu Ambuya, ŵadingang'enge mwaku iwo! Ndipo wose ŵakunyoroka mu mtima ŵangarenge!