Sumu 63 - Tonga Bible 1986

Mzimu wakuparanthuka ukhorwa ndi Chiuta

Sumu yaku Davidi, wachiŵa mu bozwa laku Yuda

¹ A Chiuta, ndimwe Chiuta wangu, ndipenja imwe, mzimu wangu uparanthukiya imwe, mtima wangu wose unweka imwe, nge ncharu cha chiparamba chakuvuka chamburamaji.

² Mphanyi ndamuwonani mu malo ghakupaturika, mphanyi ndawona nthazi yinu ndi unkhankhu winu.

³ Chifukwa chifundu chinu nchamampha kwakuruska umoyo, viyo milomo yangu yikarumbanga imwe.

⁴ Ndiwongenge imwe ndichiŵa wamoyo, ndisoskenge manja ghangu kwaku imwe mu kuromba.

⁵ Mzimu wangu ukarghanga dghera, ndi kuguta, ndipo ndimbenge sumu zakukonda zakutumbika imwe.

⁶ Po ndigona pa chita changu ndikumbuka imwe, usiku wose ndighanaghana ndi imwe;

⁷ pakuti mwaŵa movya wangu, ndipo mu chiduzi cha mapapiku ghinu ndikoŵera ndi kukondwa

⁸ Mzimu wangu uskepere kwaku imwe; janja linu lakurghiya landikoreze.

⁹ Kweni wo ŵapenja kundibaya ŵasikiyenge ku malo gha kusi kwa charu;

¹⁰ ŵakombolekiyenge ku nthazi ya lipanga, ŵakaŵanga chakurgha cha ŵakambwe.

¹¹ Kweni karonga wakondwenge mwaku Chiuta; wose ŵakurapiya paku iyo ŵangarenge; chifukwa milomo ya ŵatesi yikajarikanga.