Sumu 60 - Tonga Bible 1986

Kuliriya kugodeka mu nkhondo ndi kurombe chovyo

Sumu yaku Davidi, kusambizga; wachilimbana ndi Aramu-naharaimu ndi Aramu-zoba, wanguwe Yoabu ndi kubayapo Edomu mu chinkhwawu cha mche, vikwi chumi ndi viŵi (12,000)

¹ A Chiuta mwatijowo, mwafyo vivekeru vidu; mwakaripa; tiwerezgenimo.

² Mwachitenthemeska charu, mwachi waruwa; nozgani so kubwanganduka kwake, chifukwa sono chirazga kukuwa!

³ Mwachitiska khamu linu kukomwa vinonono ukongwa; mwatimweska vinyo wakutizendezendeska.

⁴ Mwajintha mbendera yaku wo ŵatimopani imwe, mwakuti ŵawunjikanepo pa kuthaŵa ku uta.

⁵ Alinga kuti wakwanjiwa winu wataskike, paskani upundi ndi janja linu lakurghiya ndipo mutamuke!

⁶ Chiuta wakamba mu malo ghake ghakupaturika: “Ndikulankha ndigaŵenge Shekemu ndipo ndipimenge ndimi mu chidika cha Sukoto.

⁷ Gileada ngwangu; ngwangu Manase; Efraimu nchivekeru cha mutu wangu; Yuda ndi ndodo yangu ya ufumu.

⁸ Moabu ndi beseni langu lakusambiyamo; paku Edomu ndipo ndipong'a viyatu vyangu; paku Filisti ndi bangura mwa upundi.”

⁹ Njani yo wakanditoliyanga mu muzi wa malinga ghakukho? Njani wandirongozgenge ku Edomu?

¹⁰ Kumbi asi imwe mwatijowo, A Chiuta? Kuti muruta ndi nkhondo zidu cha, Ambuya.

¹¹ Tipaskeni chovyo pa ŵakupindikana ŵidu, pakuti kovya kwa munthu kuti nkhanthu cha!

¹² Pamoza ndi Chiuta tikachitanga kwakukhuza; ndipo wakandirizgenge ŵakumikana nafwe.