Sumu 57 - Tonga Bible 1986Kurombe kutaskika ku ŵakuzingizga ( Sumu 108.1-5 ) Ku wakumba mura; pa Ali-tashihete. Sumu yaku Davidi: wachithaŵa kwaku Sauli, mu mphanji 1 Ndichitiyeni lisungu, A Chiuta, ndichitiyeni lisungu, pakuti mwaku imwe udingang'a mzimu wangu; mu chiduzi cha mapapiku ghinu ndimo ndidingang'enge, mpaka po vyajumpha vimphunga vya phasulu. 2 Ndiliriya kwaku Chiuta wapachanya limu, kwaku Chiuta yo watindifiskiya vyose. 3 Watumenge kutuwa kuchanya ndi wanditaskenge, walengeskenge wo ŵatijitunthwiya paku ine. Chiuta wakatumanga chifundu chake ndi ukongorekwa wake! 4 Ndigona mukati mu zinkharamu zo zendi chirghoko chakuthwazuwa ŵana ŵa ŵanthu; minyu ghawo ndi mikondo ndi mivwi, malilime ghawo ndi malipanga ghakuthwa. 5 Mutumphuskike A Chiuta, pachanya mu machanya! Unkhankhu winu uŵe pachanya pa charu chose chapasi! 6 Wanguthyiya chirepami chapu yangu; mzimu wangu ungukotama pasi. Wangukumba zenje munthowa yangu, kweni iwo ŵeneko ndiwo ŵawamo. 7 Mtima wangu wakhozgeka, A Chiuta, mtima wangu wakhozgeka! Ndimbenge ndi ndikoŵerenge! 8 Yuka, mzimu wangu! Yuka, wabangwi ndi kaligu we! Ndiyukenge ndi chivivivi! 9 Ndiwongenge imwe, Ambuya, mukati mu ŵanthu; ndimbiyenge kwaku imwe marumbu mukati mu mitundu. 10 Chifukwa nchikuru mpaka ku machanya chifundu chinu, kugomekezgeka kwinu kufika mpaka ku mitambo. 11 Mukwezgeke, A Chiuta, pachanya pamachanya! Unkhankhu winu uŵe pachanya pa charu chose chapasi! |
Bible Society of Malawi
Bible Society of Malawi