Sumu 56 - Tonga Bible 1986

Kuŵeyere utaski, ndi chigomekezgu mwaku Chiuta, chakuwonge

Ku wakumba mura; pa Janatiele murehokimu. Sumu yaku Davidi: achimuko a Filisti mu Gati

¹ Ndichitiyeni wezi, A Chiuta, chifukwa zuŵa lose ŵakurwana nane ŵandifinyikizga;

² ŵamawongo ŵangu ŵatindikandirizga zuŵa lose, pakuti mbanandi wo ŵapumana nane mwakujikuzga.

³ Ndichiŵa wamantha, ndiŵika chigomezgu changu mwaku imwe.

⁴ Mwaku Chiuta, mweniyo ndirumba mazu ghake, mwaku Chiuta ndigomekezga kwambura kopa. Wangachitanji nane munthu?

⁵ Zuŵa lose ŵapenja kung'anamuwa mazu ghangu; marunguruku ghawo ghose ghe pangu kundichitiya uheni.

⁶ Ŵamangana pamoza, ŵabisama, ŵathowa mendedu ghangu. Nge ndimo ŵakhazgiya umoyo wangu,

⁷ viyo muŵawezge mphoto yapa uheni wawo; ŵagadabuliyeni pasi mu ukari winu, A Chiuta!

⁸ Imwe mwaŵerenga ndi mwasunga kuwuraura kwangu; masozi ghangu mughaŵike mu supa yinu! Asi ghe mu buku linu?

⁹ Penipo ndipo ŵarwani ŵangu ŵaweriyenge vuli muzuŵa lo ndidaniya. Cho ndiziŵa nchakuti, Chiuta we pamoza nane.

¹⁰ Mwaku Chiuta, mweniyo ndirumba mazu ghake, mu Ambuya, ŵeniwo ndirumba mazu ghawo,

¹¹ mwaku Chiuta ndigomekezga kwambura kopa. Wangachitanji nane munthu?

¹² Marapu ghangu kwaku imwe nditenere kufiska, A Chiuta; ndiperekenge kwaku imwe mipasku yakuwonga.

¹³ Chifukwa imwe mwapozomoska mzimu wangu ku nyifwa, inya, marundi ghangu ku kuwa, alinga kuti ndendenge paurongo paku Chiuta mu ukweru wa umoyo.