Sumu 55 - Tonga Bible 1986

Kurombe kunangika kwa ŵakupusika

Ku wakumba mura; pa vyamalisinga. Sumu yaku Davidi

¹ Tegherezgani gutu linu ku rombu langu, A Chiuta; ndipo rekani kujibisa ku kuŵeyere kwangu!

² Avwani kwangu, ndi mundamuke; ndaruskika ndi suzgu yangu.

³ Ndatimbanizgika ndi kuwawata kwa murwani, chifukwa cha kuzingizga kwa ŵaheni; pakuti ndi wo ŵatinditore suzgu, ndipo mu ukari wawo ŵatindizingizga.

⁴ Mtima wangu ngwakuŵaŵa ukongwa mukati mwangu, vyakofya vya nyifwa vyandiwiya.

⁵ Wofi ndi chitenthe vyandiziya, ndipo chofyo chandivunikiriya.

⁶ Pa chifukwa ichi ndititi, “Owe, ndenga ndi mapapa nge ndi nkhunda! Mphanyi ndaphururukiya kutali kuti nkhapumuwe;

⁷ inya, mphanyi ndayingiya kutali, mphanyi ndigona mu bozwa.

⁸ Mphanyi ndatinthimika kusaniya chakubisamamo, kutuwako ku mphepo ya lirondo ndi chimphunga.”

⁹ Bwanganduwani viŵembu vya wo, Ambuya, timbanizgani malilime ghawo; chifukwa ndiwona chivurupi ndi ndeu mu msumba.

¹⁰ Msana ndi usiku ŵazunguliyazunguliya pa malinga ghake, ndipo utimbanizi ndi suzgu vye mukati mwake,

¹¹ Phasulu le mukati mwake; kukandirizgika ndi kupusika kuti vituwamo cha mu malo ghake gha malonda.

¹² Yo watindinyoza kuti ndi murwani cha, asani kwenga viyo mphanyi ndakunthiyapo; kuti ngwakupindikana cha yo watindisunjizga, asani kwenga viyomphanyi ndingubisama kwaku iyo.

¹³ Kweni ndiwe, wakulingana nane, mwanasi wangu, bwezi lakuziŵiriyana nalo.

¹⁴ Tinguziŵiriyana kukambiskana ghakunowa pamoza; mu nyumba yaku Chiuta tayendiyanga mu umoza widu.

¹⁵ Nyifwa yiŵaziye; ŵasikiye ku muunda ŵamoyo; ŵarutenge ku miunda yawo ndi mantha.

¹⁶ Kweni ine ndidana kwaku Chiuta; Ambuya anditaskenge.

¹⁷ Ku mazulo, ku mlenji, ndi ku msana pakati ndidandaula ndi kutamantha, ndipo iyo wakavwanga mazu ghangu.

¹⁸ Wapozomoskenge mzimu wangu mu chimangu mu nkhondo yo nditurwa, pakuti ŵakumikana nane mbanandi.

¹⁹ Chiuta wavwenge, ndi kuŵachetamiska yo wepa chitengo kutuliya ku mwaka; chifukwa iwo kuti ŵasunga dangu cha, ndipo kuti ŵatopa Chiuta cha.

²⁰ Mwanasi wangu wangutambaruliya janja lake kumikana ndi ŵabwezi ŵake, wanguswa phanganu lake.

²¹ Karongororero kake kenga kakusilirika kwakuruska mafuta gha mukaka, kweni nkhondo yenga mu mtima wake; mazu ghake ghenga gha koloŵa kwakuruska mafuta, kweni ndipuuli ghenga malipanga ghakuwewepuwa.

²² Taya pa Ambuya mphingu yako, ndipo iwo akakuchirikizganga; kuti azomerezgenge nanga nkhamana cha kuti wakurunjika wawo wasukuniskike.

²³ Kweni imwe A Chiuta, muŵapong'enge pasi, mu zenje la pharghaniko; ŵanthu ŵakudiska ndopa ndi ŵakupusika kuti ŵafiskenge mazuŵa gha umoyo wawonanga mphakatikati cha. Ine ndigomekezgenge mwaku imwe.